१५ पुस, मेचीनगर : स्रोत नखुलेको भारतीय छ लाखभन्दा बढी रुपैयाँसहित भारतीय नागरिकलाई मंगलबार झापाको काँकरभिट्टाबाट नियन्त्रणमा लिइएको छ । दिउँसो १ बजेतिर स — शस्त्र प्रहरी बल नेपाल, सीमा सुरक्षा गुल्म हे.क्वा. काँकरभिट्टा र मेची भन्सार कार्यालयको टोलीले संयुक्तरुपमा भारतको अरुणाञ्चल प्रदेश तवाङ जिल्ला बस्ने करिव ६२ वर्षीय लोमसाङ्ग फूलचोकलाई नियन्त्रणमा लिइएको स —शस्त्र प्रहरीले जनाएको छ ।
मेची भन्सार कार्यालय काँकरभिट्टाको यात्रु शाखा परिसरबाट नियन्त्रणमा लिइएका फूलचोकका साथबाट भारतीय छ लाख ३० हजार रुपैयाँ फेला परेको छ र उक्त पैसाको स्रोत नखुलेका कारण आवश्यक अनुसन्धानका लागि नियन्त्रणमा लिइएको मेची भन्सार कार्यालय काँकरभिट्टाका एकजना अधिकृतले बताए ।
उनले नेपालका विभिन्न स्थानमा आर्थिक सहयोग गर्न उक्त रकम लिएर नेपाल आएको, आफूसहित अन्य ३२ जना रहेको र बाकी साथीहरु काठमाडौं पुगेको र आफूले यो रकम नेपाली बनाएर लिएर जाने प्रारम्भिक बयान दिएका छन् । मुद्धा फायल तयार गरी बरामद रकमसहित उनलाई इलाका प्रहरी कार्यालय काँकरभिट्टाको हिरासतमा पठाईएको र भोली आवश्यक अनुसन्धानका लागि राजस्व अनुसन्धान इटहरी पठाउने तयारी गरीएको भन्सार अधिकृतले बताए ।
