विराटनगर / नेत्रविक्रम चन्द ‘विप्लव’ नेतृत्वको नेकपाले नियन्त्रणमा लिएर हत्या गरिएका शिक्षककाे अन्त्यष्टि गरिएकाे छ । मोरङको मिक्लाजुङका शिक्षक ५३ वर्षीय राजेन्द्रकुमार श्रेष्ठको बिहीबार बिहान अन्तिम विदाई गरिएको हाे । श्रेष्ठको शवको मंगलबार बीपी कोइराला स्वास्थ्य विज्ञान प्रतिष्ठानमा पोस्टमार्टम गरिएको थियो ।
बिहानै घरको काम गरिरहेका बेला घरबाटै अपहरण गरेर मिक्लाजुङ गाउँपालिका–१ स्थित बर्खेको सरस्वती आधारभूत विद्यालयका प्रधानाध्यापक श्रेष्ठको मंगलबार बिहान बर्बरतापूर्ण तरिकाले हत्या गरेको थियो ।
मिक्लाजुङ–२ स्थित मुल घरमा रातभर शव राखेर बिहीबार बिहान १० बजेतिर अन्त्येष्टि गरिएको गाउँपालिका अध्यक्ष देवीप्रसाद आचार्यले बताए । उक्त घरमा छोरा छत्रबहादुर परिवारसहित बस्थे । आचार्यका अनुसार मिक्लाजुङ–२ र ७ को संगमस्थल भएर बग्ने बक्राहा खोलाको घाटमा श्रेष्ठको हिन्दु संस्कारअनुसार अन्तिम विदाई गरिएको हो । श्रेष्ठको पार्थीव शरीरमा छोरा छत्रबहादुरले दागवत्ति दिएका थिए ।
