३० कार्तिक, काठमाडौँ : भक्तपुरमा बुधबार बिहान भएको आगलागीमा एक जनाको मृत्यु भएको छ।
मध्यपुरथिमी नगरपालिका– ६ माथिल्लो कुण्डोलका आत्माराम केसी र हरिशरण केसीको तीन तले घर जलेकाे हो। आगलागीमा परेर घरभित्र रहेकी आत्मारामकी छोरी २५ वर्षीया छोरी अस्मिताको ज्यान गएको प्रहरी परिसर भक्तपुरका सूचना अधिकारी डीएसपी राजु पाण्डेले जानकारी दिए।
सुस्तमनस्थिति र प्यारालाइसिसबाट समेत ग्रस्त अस्मिता घरभित्रै जलेको अवस्थामा भेटिएको उनले बताए। आगलागीमा घाइते हरिशरणकी १४ वर्षीया छोरी नित्माको कोरियन अस्पतालमा उपचारपश्चात् डिस्चार्ज गरिएको छ।
आगो लाग्नुको कारण खुलिनसकेको प्रहरीको भनाइ छ।
