काठमाडौँ: नेपाल प्रहरीले भदौ २३ गतेदेखि २५ गतेसम्म भएको आन्दोलनका क्रममा प्रदर्शनकारीले नियन्त्रणमा लिएका वा लुटिएका प्रहरीका हतियार, सञ्चार साधन, सवारी साधन र पोशाक लगायतका सामग्रीहरू फिर्ता गर्न आग्रह गरेको छ।
आज एक विज्ञप्ति जारी गर्दै प्रहरीले आन्दोलनका क्रममा लुटिएका सामग्रीहरू नियन्त्रणमा लिएको वा कतै फेला पारेमा नजिकको प्रहरी कार्यालय वा सुरक्षा निकायलाई बुझाउन अनुरोध गरेको हो।
प्रहरीका अनुसार, फिर्ता गर्नुपर्ने सामग्रीहरू:
- सुरक्षा हातहतियार
- सञ्चार साधन
- सवारी साधन
- पोशाक र अन्य भौतिक साधन
प्रहरीले यी सामग्रीहरू फेला परेमा स्थानीय प्रहरी, जिल्ला प्रहरी कार्यालय वा निम्न सम्पर्क नम्बरहरूमा बुझाउन सकिने जानकारी दिएको छ:
- प्रहरी कन्ट्रोल: १००
- टोल फ्री नं.: १६६००१४१५१६
- नेपाल प्रहरी प्रधान कार्यालय: ९८५१२९३४५९
साथै, प्रहरीले प्रदर्शनकारीले नियन्त्रणमा लिएका प्रहरी पोशाकको दुरुपयोग नगर्न र सोसँग सम्बन्धित कुनै पनि सूचना भएमा उपलब्ध गराउन पनि सर्वसाधारणलाई अनुरोध गरेको छ।
