मेचीनगर, माघ ६ ।प्रदेश १ का मुख्यमन्त्री शेरधन राई विरुद्द अविश्वासको प्रस्ताव राख्दै प्रचण्ड नेपाल पक्षमा रहेका प्रदेश सांसदहरु ओली पक्षमा समर्थन गर्ने भएको छन् । झापाका तीन प्रदेश सांसदहरु गोपालचन्द्र बुढाथोकी, श्रीप्रसाद मैनाली र जसमाया गजमेरले प्रधानमन्त्री केपी शर्मा ओली पक्षीय प्रदेश १ का मुख्यमन्त्री शेरधन राईलाई समर्थन गर्ने निर्णयमा पुगेका हुन् ।
तीनै जना सांसदहरुले यस अघि मुख्यमन्त्री राई विरुद्द दर्ता गराइएको अविश्वासको प्रस्तावमा गरेको समर्थन सोमबार फिर्ता लिएको सांसद बुढाथोकीले एक संचार माध्यमलाई जानकारी दिनु भयो । पछिल्लो समयमा पार्टी एक हुनुपर्ने धारणा राख्दै आएका प्रदेश सांसदहरु नेकपाका वरिष्ठ नेता बामदेव गौतमको समेत समर्थनमा रहेका थिए ।
मेचीनगरका स्थानीय सांसद मैनाली र बुढाथोकी क्रमशःझापा क्षेत्र न १ (क) र (ख) बाट निर्वाचित सांसद हुन भने बिर्तामोड निवासी गजमेर समानुपातिक सांसद हुनुहुन्छ ।
