आइजिपी कार्कीको राजीनामा दबाबबारे आएका भ्रामक समाचारप्रति प्रहरीको गम्भीर ध्यानाकर्षण

नेपाल प्रहरीका महानिरीक्षक (आइजिपी) दानबहादुर कार्कीमाथि राजीनामाको दबाब बढेको भन्ने आशयका समाचार तथा टिप्पणीहरूप्रति प्रहरी प्रधान कार्यालयले गम्भीर ध्यानाकर्षण भएको जनाएको छ। अपुष्ट सूचनाका आधारमा भ्रम फैलाउने गतिविधिप्रति कडा आपत्ति जनाउँदै प्रहरी मुख्यालयले यस्ता कार्यमा संलग्न व्यक्तिहरूमाथि कानुनी कारबाही अघि बढाइने स्पष्ट पारेको छ।

केन्द्रीय प्रहरी प्रवक्ता एवं प्रहरी नायव महानिरीक्षक अविनारायण काफ्लेद्वारा जारी प्रेस विज्ञप्तिमा पुष्टि नभएका विषयलाई अनुमानका आधारमा समाचार तथा टिप्पणीका रूपमा प्रस्तुत गर्दा आम नागरिकमा भ्रम र नकारात्मकता सिर्जना हुने उल्लेख छ। सुरक्षा जोखिम बढाउने तथा नागरिकको सेवामा सदैव समर्पित संस्थाप्रतिको विश्वास, सांगठनिक छवि र निष्ठामा असर पार्ने किसिमका अपुष्ट, भ्रामक तथा तथ्यहीन सूचनाको पछि नलाग्न सञ्चारमाध्यम, सामाजिक सञ्जाल प्रयोगकर्ता र सरोकारवालालाई आग्रह गरिएको छ।

कानुनी कारबाहीको चेतावनी र सञ्चारमाध्यमलाई आग्रह

प्रहरी मुख्यालयले सुरक्षा संगठनलाई विवादमा तानेर सरकारविरुद्ध खेल्न सकिन्छ भन्ने सोच राखेका सीमित व्यक्तिको गतिविधिमाथि निगरानी बढाइएको जनाएको छ। सत्य, तथ्यपरक तथा विश्वसनीय सूचना प्राप्त गर्नु नागरिकको मौलिक अधिकार भएको उल्लेख गर्दै समाचार प्रकाशन वा प्रसारण गर्नुअघि सम्बन्धित निकायबाट तथ्य पुष्टि गर्न जोड दिइएको छ। पत्रकारिताको व्यावसायिक आचारसंहिता पालना गर्दै सूचनाको सत्यता सुनिश्चित गर्न पनि आग्रह गरिएको छ।

उच्च मनोबलका साथ काम गर्न निर्देशन

सरकारको नीति निर्देशनअनुसार नागरिकप्रतिको विधिसम्मत जिम्मेवारी र उत्तरदायित्व निर्वाह गर्न नेपाल प्रहरी सदैव प्रतिबद्ध रहेको स्पष्ट पारिएको छ। प्रहरी नेतृत्व र संगठनलाई लक्षित गरी सार्वजनिक भइरहेका भ्रामक प्रचार, अनावश्यक दबाब वा गैरकानुनी गतिविधिबाट विचलित नभई उच्च मनोबलका साथ एकताबद्ध भएर आआफ्नो संवैधानिक तथा कानुनी जिम्मेवारी पूरा गर्न सकल दर्जाका कर्मचारीहरूलाई निर्देशन दिइएको छ। सार्वजनिक सुरक्षा, शान्ति–अमनचयन कायम गर्ने र अपराध नियन्त्रण गर्ने आफ्नो मुख्य दायित्वबाट संस्था कहिल्यै नविचलित हुने प्रहरीले जनाएको छ।