काठमाडौँ । सरकारका प्रवक्ता तथा सञ्चारमन्त्री सस्मित पोखरेलले नेपाल-भारत सीमा सम्बन्धी विषयमा प्रधानमन्त्री बालेन शाह आवश्यकता परे पुनः संसद्मा उपस्थित भएर जवाफ दिन तयार रहनुभएको बताउनुभएको छ। मन्त्रिपरिषद्को निर्णय सार्वजनिक गर्न आयोजित नियमित पत्रकार सम्मेलनमा बोल्दै प्रवक्ता पोखरेलले यस्तो जानकारी दिनुभएको हो।
प्रवक्ता पोखरेलले वर्तमान सरकारले सीमा, राष्ट्रिय स्वाधीनता र कूटनीतिक विषयलाई अत्यन्तै गम्भीर रूपमा लिएको स्पष्ट पार्नुभयो। संसद्मा जनप्रतिनिधिहरूद्वारा उठेका प्रश्नहरूको जवाफ दिन सरकार पूर्ण रूपमा जिम्मेवार रहेको उल्लेख गर्दै उहाँले प्रधानमन्त्री स्वयं पनि आवश्यक परेका खण्डमा थप स्पष्टिकरण दिन तयार रहनुभएको बताउनुभयो।
हाल नेपाल–भारत सीमा क्षेत्रको विषयलाई लिएर संसद् तथा राजनीतिक वृत्तमा व्यापक बहस र छलफल भइरहेको छ। विपक्षी दलहरूले सीमा सुरक्षा र कूटनीतिक पहलका विषयमा सरकारसँग स्पष्ट धारणा माग गरिरहेका बेला सरकारका तर्फबाट प्रवक्ता पोखरेलले यस्तो अर्थपूर्ण अभिव्यक्ति दिनुभएको हो। राष्ट्रिय हितका सवालमा सरकार सधैँ पारदर्शी ढङ्गले अघि बढ्ने र संसद्को सर्वोच्चतालाई सम्मान गर्ने नीतिमा सरकार दृढ रहेको समेत उहाँले प्रस्ट पार्नुभयो।
