बाढीपहिरो प्रभावित म्याग्दीमा विद्युत आपूर्ति पूर्ववत्, ग्रामीण जनजीवन सहज बन्दै

गत महिनाको बाढीपहिरोबाट प्रभावित बनेको म्याग्दी जिल्लाका सबै स्थानमा विद्युत आपूर्ति पूर्ववत् भएको छ। नेपाल विद्युत प्राधिकरणको बेनी र तातोपानी वितरण केन्द्रले बाढीपहिरोले क्षति पुर्‍याएका प्रशारण तथा शाखा लाइनलगायतका संरचना मर्मत गरेर विद्युत आपूर्ति सुचारु गरेका हुन्।

प्राधिकरणको बेनी वितरण केन्द्रका प्रमुख सत्यनारायण गामीले सबैभन्दा बढी प्रभावित अन्नपूर्ण गाउँपालिका–५ पाउद्धारमा शनिबार बत्ती बलेको जानकारी दिए। उनका अनुसार धेरै ठाउँमा दुई–तीन दिनमै विद्युत आपूर्ति गराइए पनि पाउद्धार, गिवाङ र किन्दु क्षेत्रमा चाडपर्वको समयसमेत बेवास्ता गरी कर्मचारी तथा मजदुरहरू रातिसम्म परिचालन भएका थिए। कतिपय स्थानमा वैकल्पिक माध्यम र संरचनाबाट विद्युत आपूर्ति गराइएको र दोस्रो चरणमा थप मर्मत गरी यसलाई नियमित र व्यवस्थित बनाउने प्रयास भइरहेको छ।

क्षति र वैकल्पिक व्यवस्था

बाढीपहिरोले प्राधिकरणको ३३/११ केभीको प्रशारण तथा वितरण लाइनका दुई सय ५० वटा पोल र तानिएका तारहरूमा क्षति पुर्‍याएको थियो। यसबाट कुल एक करोड ५० लाख रुपैयाँ बराबरको क्षति भएको बेनी वितरण केन्द्रले जनाएको छ। अन्नपूर्ण गाउँपालिकाको राम्चे र हिस्तानमा पर्वतको जलजला गाउँपालिका–५ लेकफाँटतर्फबाट विद्युत आपूर्ति गरिएको छ, जहाँ यसअघि महभिरतर्फबाट लाइन जोडिएको थियो।

त्यस्तै, पाउद्धारमा हेलिकप्टरबाट ढुवानी गरिएको ट्रान्सफर्मरले काम नगरेपछि घार गाउँबाट विद्युत आपूर्ति गराइएको प्रमुख गामीले बताए। म्याग्दी वितरण केन्द्रअन्तर्गतको मिलनचोक सबस्टेसनमार्फत पर्वतको जलजला गाउँपालिकाको मल्लाज र वारीबेनीसहित २४ हजार चार सय ९० ग्राहक लाभान्वित भएका छन्। तातोपानी वितरण केन्द्रअन्तर्गत अन्नपूर्ण गाउँपालिकाका १, २, ३ र ४ नम्बर वडासहित मुस्ताङमा पनि विद्युत आपूर्ति हुँदै आएको छ। ग्रामीण क्षेत्रमा पुनः विद्युत बलेपछि जनजीवन सामान्य बन्दै गएको छ।