पोखरामा ट्वाइलेटको च्याम्बरमा नवजात शिशु फालेर फरार आमा पक्राउ

पोखराको लेकसाइडस्थित एक घरको ट्वाइलेटको च्याम्बरमा सालनालसहितको नवजात शिशु फालेर फरार भएकी आमालाई प्रहरीले पक्राउ गरेको छ। मृत शिशु फेला परेको केही दिनपछि फरार रहेकी १९ वर्षीया महिलालाई प्रहरीले नियन्त्रणमा लिन सफल भएको हो।

पक्राउ पर्नेमा पोखरा महानगरपालिका-२१ कृष्टी माइती भई स्याङ्जाको अर्जुन चौपारी गाउँपालिका-१ घर भएकी १९ वर्षीया निरुता नेपाली रहेकी छन्। उनलाई कास्की जिल्ला अदालतबाट कर्तव्य ज्यान सम्बन्धी कसूरमा १० दिनको म्याद थप गरी हिरासतमा राखेर अनुसन्धान अघि बढाइएको जिल्ला प्रहरी कार्यालय कास्कीका सूचना अधिकारी एवं प्रहरी नायव उपरीक्षक बिरेन्द्र कुमार पासवानले जानकारी दिएका छन्।

घटनाको विवरण र प्रहरी अनुसन्धान

प्रहरीका अनुसार कात्तिक ३ गते साँझ करिब ७:४० बजे पोखरा-६ लेकसाइडस्थित स्ट्रिट नम्बर ८ को भित्री गल्लीमा तोड बहादुर थापाको टिनले छाएको टहरामा रहेको ट्वाइलेट जाम भएको थियो। पानी नबगेपछि घरधनीले ट्वाइलेट बाहिर रहेको च्याम्बर खोलेर हेर्दा भर्खरै जन्मिएको सालनालसहितको पुरुष नवजात शिशु मृत अवस्थामा फेला परेको थियो।

घटनाको जानकारी पाएलगत्तै वडा प्रहरी कार्यालय बैदामबाट खटिएको प्रहरी टोलीले घटनास्थलको लासजाँच मुचुल्का गरी शिशुको शव पोष्टमार्टमका लागि पोखरा स्वास्थ्य विज्ञान प्रतिष्ठान अन्तर्गतको पश्चिमाञ्चल क्षेत्रीय अस्पताल पठाएको थियो। प्रहरीले यस घटनाबारे थप अनुसन्धान भइरहेको जनाएको छ।