एनपीएलमा जनकपुरका बलर राहुल यादवको चम्किलो प्रदर्शन: सिनियरबाट सिकिरहेको छु

नेपाल प्रिमियर लिग (एनपीएल) क्रिकेटमा जनकपुर बोल्ट्सका युवा बलर राहुल यादवले उत्कृष्ट प्रदर्शन गर्दै सबैको ध्यान खिचेका छन्। बिहीबार सम्पन्न काठमान्डु गोर्खाजविरुद्धको खेलमा चार विकेट लिएर प्लेयर अफ दि म्याच घोषित भएपछि १६ वर्षीय राहुलले यो मञ्च आफ्ना लागि ठूलो सिक्ने अवसर भएको बताएका छन्।

काठमान्डुविरुद्धको खेलमा घातक बलिङ गर्दै चार विकेट लिएका राहुलले एक उत्कृष्ट क्याच पनि लिएका थिए। जारी एनपीएलमा उनले दुई खेल खेल्दै ६ विकेट लिइसकेका छन्। यसअघि कर्णाली याक्सविरुद्धको खेलमा पनि उनले पहिलो ओभरमै विकेट लिएका थिए भने काठमान्डुविरुद्धको खेलमा पहिलो ओभरको पहिलो बलमै सफलता हासिल गरेका थिए।

सिनियर खेलाडीबाट सिकाइ जारी

खेलपछि प्रतिक्रिया दिँदै युवा बलर राहुलले आफू टोलीको सबैभन्दा कान्छो खेलाडी रहेको र सिनियर दाजुहरूबाट निरन्तर सिकिरहेको बताए। उनले पहिलो खेल र दोस्रो खेल दुवैमा सुरुवातमै विकेट लिन सफल भएकोमा खुसी व्यक्त गरे।

'पहिलो खेलमा पहिलो ओभरमै विकेट लिएँ। दोस्रो खेलमा पनि पहिलो बलमै विकेट लिन सफल भएँ। खुशी लागेको छ,' उनले भने, 'टोलीमा सबैभन्दा कान्छो खेलाडी पनि म नै हुँ। अहिले म सिनियर दाजुहरूसँग धेरै कुरा सिकिरहेको छु।'