एनपीएल क्रिकेट: काठमाण्डौलाई ८ विकेटले हराउँदै जनकपुर बोल्ट्सको पहिलो जित

नेपाल प्रिमियर लिग (एनपीएल) अन्तर्गत कीर्तिपुरस्थित त्रिवि अन्तर्राष्ट्रिय क्रिकेट मैदानमा भएको पहिलो खेलमा जनकपुर बोल्ट्सले काठमाण्डौ गोर्खाजलाई ८ विकेटले पराजित गर्दै प्रतियोगितामा पहिलो जित निकालेको छ। पहिलो खेलमा कर्णाली याक्ससँग पराजित भएको जनकपुरले यस पटक शानदार पुनरागमन गर्दै अंक तालिकामा महत्वपूर्ण जित जोडेको छ।

काठमाण्डौले दिएको ११६ रनको सामान्य लक्ष्य पछ्याउने क्रममा जनकपुरले १७ ओभर २ बलमा मात्र २ विकेट गुमाएर लक्ष्य भेटायो। जनकपुरको जितमा मोइन अलीले उत्कृष्ट ब्याटिङ गर्दै नटआउट ५८ रन बनाए भने सैफ हसनले नटआउट ४० रनको योगदान दिए। काठमाण्डौका तर्फबाट रिपन मण्डलले १ विकेट हात पारे पनि टोलीलाई हारबाट बचाउन असफल रहे।

काठमाण्डौको कमजोर ब्याटिङ प्रदर्शन र राहुल यादवको बलिङ
यसअघि टस जितेर पहिले ब्याटिङ गरेको काठमाण्डौले निर्धारित ओभर पूरा गर्न सकेन र १९ ओभर ३ बलमा अलआउट हुँदै ११५ रन मात्र बनाउन सक्यो। काठमाण्डौका लागि भीम सार्कीले सर्वाधिक ३३ रन बनाए पनि अन्य ब्याटरहरू क्रिजमा टिक्न सकेनन्।

जनकपुरका बलर राहुल यादवले धारिलो बलिङ गर्दै काठमाण्डौको ब्याटिङ लाइनअप धराशयी बनाए। राहुलले एक्लैले ४ विकेट लिएर काठमाण्डौलाई सस्तो यो योगमै समेट्न महत्त्वपूर्ण भूमिका खेले।

एनपीएलको आगामी खेलहरू
प्रतियोगिता अन्तर्गत आजै हुने दोस्रो खेलमा बेलुका ५ बजे विराटनगर किङ्ग्स र कर्णाली याक्सबीच प्रतिस्पर्धा हुनेछ। विराटनगर आफ्नो पहिलो खेलमा चितवन राइनोजसँग ८ रनले पराजित भएको थियो। आठ वटा टोलीको सहभागिता रहेको तेस्रो संस्करणको एनपीएल आगामी मङ्सिर ५ गतेसम्म सञ्चालन हुनेछ।