अन्तर्राष्ट्रिय बजारमा कच्चा तेल र सुनको मूल्य आकाशिन सक्ने प्रक्षेपण

खाडी क्षेत्रमा बढ्दै गएको स्ट्रेट अफ हर्मुजको सुरक्षा चुनौती र प्रमुख शक्ति राष्ट्रहरूको राजनीतिक अनिश्चितताका कारण अन्तर्राष्ट्रिय बजारमा कच्चा तेल र बहुमूल्य धातुहरूको मूल्यमा ठूलो उछाल आउने प्रक्षेपण गरिएको छ। विश्लेषकहरूका अनुसार आगामी दिनमा कच्चा तेलको मूल्य प्रति ब्यारेल ११० अमेरिकी डलरदेखि माथि पुग्न सक्छ भने सुनको मूल्य प्रति औंस ४ हजार ६०० अमेरिकी डलर नाघ्ने सम्भावना बढेको छ।

विश्व बजारमा ऊर्जा र बहुमूल्य धातुको यो उतारचढावले 'कमोडिटी इकोनोमी'लाई प्रत्यक्ष असर पार्ने बताइएको छ। यसको सिधा असर आयातमा निर्भर नेपालजस्ता विकासोन्मुख मुलुकहरूमा समेत पर्ने अर्थशास्त्रीहरूको भनाइ छ। संसारको कूल तेल आपूर्तिको झन्डै २० प्रतिशत हिस्सा ओगट्ने स्ट्रेट अफ हर्मुजमा देखिएको अवरोधका कारण इन्धनको मूल्य थप आकासिने खतरा कायम रहेको छ।

राजनीतिक घटनाक्रम र बजारमा प्रभाव

इजरायलमा बहुमत जुटाउन जारी राजनीतिक खिचातानी र अमेरिकाको मध्यावधि निर्वाचनको नतिजाले खाडी क्षेत्रको आगामी रणनीति तय गर्ने भएकाले कमोडिटी बजार अहिले 'पर्ख र हेर' को स्थितिमा रहेको छ।

त्यसैगरी, फ्रान्स र इटालीमा देखिएको नीतिगत अनिश्चितताका कारण युरोपेली युनियनको 'ग्रिन इनर्जी' नीतिको भविष्य पनि दोधारमा परेको छ। यसले सोलर प्यानल र नवीकरणीय ऊर्जामा प्रयोग हुने चाँदीको औद्योगिक मागमा ठूलो उतारचढाव ल्याएको विश्लेषकहरूले बताएका छन्।