आयातित फूलको विकल्प खोज्दै मेचीनगरका रास्वपा वडा सभापति तिवारी फूलखेतीमा

चाडपर्व नजिकिँदै गर्दा झापाको मेचीनगर–७, इटाभट्टाका दिपेश तिवारीको दैनिकी सयपत्री फूलको स्याहारसुसारमा बित्न थालेको छ। करिब पाँच कठ्ठा क्षेत्रफलमा फैलिएको उनको फूलबारीमा सयपत्री ढकमक्क फुल्न थालेपछि व्यस्तता बढेको छ। राजनीतिक र सामाजिक गतिविधिमा सक्रिय तिवारी पछिल्लो समय फूलखेतीमार्फत स्थानीय उत्पादन र बजारको सम्भावना खोजिरहेका छन्।

राष्ट्रिय स्वतन्त्र पार्टी (रास्वपा) मेचीनगर–७ का वडा सभापतिसमेत रहेका तिवारी व्यवसाय र सामाजिक सेवासँगै सुरु गरेको सयपत्री फूलखेतीबाट स्थानीय बजारको माग पूरा गर्ने प्रयासमा छन्। दसैं, तिहार र छठजस्ता पर्वमा सयपत्रीको माग उच्च हुने भए पनि स्थानीय उत्पादनले माग धान्न नसक्दा भारतबाट आयात हुने फूलमा निर्भर रहनुपरेको उनको भनाइ छ। आयातित फूलमा प्रयोग हुने विषादी र गुणस्तरको अनिश्चितताका कारण स्थानीयस्तरमै उत्पादन बढाउनु अपरिहार्य भएको उनले बताएका छन्।

तिहार र छठलाई लक्षित गर्दै बजार प्रवर्द्धन

पाँच कठ्ठा जग्गामा लगाइएको सयपत्रीमध्ये दसैंका लागि केही फूल बिक्री भइसकेका छन् भने बाँकी फूल तिहार र छठ पर्वलाई लक्षित गरी बजारमा पुर्‍याउने तयारी छ। समयमै फूल फुलाउन सके किसानले सहजै उचित मूल्य र बजार पाउने उनको अनुभव छ। ठूलो लगानी नभएका किसानले पनि थोरै जग्गामा सयपत्री खेती गरी आत्मनिर्भर बन्न सक्ने सन्देश उनको यो प्रयासले दिएको छ।

स्थानीय आत्मनिर्भरताको सोच

व्यवसाय र राजनीतिसँगै फूलखेतीलाई आत्मनिर्भरताको माध्यम बनाउनुपर्ने तिवारीको मान्यता छ। सबै वस्तु बाहिरबाट आयात गर्नुको सट्टा सम्भव भएका क्षेत्रमा स्थानीय उत्पादनलाई प्राथमिकता दिनुपर्नेमा उनले जोड दिएका छन्। बजारको सुनिश्चितता, प्राविधिक ज्ञान र गुणस्तरीय बिरुवा उपलब्ध गराउन सके मेचीनगरमा फूलखेतीको व्यावसायिक सम्भावना अझ फराकिलो बन्ने देखिन्छ।