📌 मुख्य बुँदाहरू:
- अस्ट्रेलिया सरकारले अन्तर्राष्ट्रिय विद्यार्थी भिसा प्रक्रिया थप कडा बनाउने तयारी गरेको छ।
- विद्यार्थीले आर्थिक क्षमता प्रमाणित गर्न बैंक खातामा देखाउनुपर्ने रकम दोब्बरसम्म बनाउने प्रस्ताव अघि सारिएको छ।
- नयाँ प्रस्तावअनुसार बैंकमा देखाइएको रकमको स्रोत, स्वामित्व र विद्यार्थीको पहुँचसमेत सूक्ष्म रूपमा जाँच गरिनेछ।
काठमाडौँ । अस्ट्रेलियाले अन्तर्राष्ट्रिय विद्यार्थीका लागि भिसा प्रक्रिया थप कडा बनाउने तयारी गरेको छ। सरकारले विद्यार्थीको आर्थिक क्षमता जाँचलाई कडाइ गर्दै बैंक खातामा देखाउनुपर्ने रकम बढाएर दोब्बर बनाउनेसहितका विभिन्न कडा प्रस्तावहरू अघि सारेको हो।
अस्ट्रेलियाको गृह मामिला विभागले सार्वजनिक गरेको छलफलपत्रमा आर्थिक क्षमता प्रमाणित गर्ने चारवटा विकल्पहरू प्रस्ताव गरिएको छ। नयाँ प्रस्तावअनुसार विद्यार्थीले अध्ययन अवधिको कुल शुल्क र जीवनयापन खर्चको ५० प्रतिशत वा पहिलो वर्षको शतप्रतिशत शुल्क तथा जीवनयापन खर्च बराबरको रकम अस्ट्रेलियाको बैंक खातामा जम्मा गरेको आधिकारिक प्रमाण पेश गर्नुपर्नेछ।
आर्थिक क्षमता जाँचका नयाँ मापदण्डहरू
प्रस्तावित नयाँ व्यवस्था लागू भएमा केही विकल्पअनुसार तोकिएको रकम भिसा आवेदन दिनुभन्दा एकदेखि तीन महिनाअघि नै बैंक खातामा जम्मा भइसकेको हुनुपर्नेछ। यसका साथै मान्यताप्राप्त शैक्षिक ऋण, छात्रवृत्ति तथा व्यक्तिगत बचतबाट मात्र आर्थिक क्षमता प्रमाणित गर्न सकिने व्यवस्था राखिएको छ।
नयाँ नियममा बैंकमा देखाइएको रकमको स्रोत, त्यसको स्वामित्व र विद्यार्थीको खातासम्मको पहुँचको समेत गहिरो छानबिन गरिनेछ। विशेषगरी, अस्ट्रेलिया पुगेktan पछि पार्टटाइम काम गरेर कमाउन सकिने आम्दानीलाई अब आर्थिक क्षमताको प्रमाणका रूपमा मान्यता नदिने प्रस्ताव गरिएको छ।
