गोठाटार स्वास्थ्य चौकी र लायन्स क्लबको सहकार्यमा दुईदिने भिटामिन ‘ए’ कार्यक्रम सम्पन्न

काठमाडौं : लायन्स क्लब अफ काठमाडौं निर्वानाले गोठाटार स्वास्थ्य चौकीसँगको सहकार्यमा दुईदिने भिटामिन ‘ए’ कार्यक्रम आयोजना गरेको छ। नेपाल सरकारद्वारा कात्तिक १७ र १८ गते देशव्यापी रूपमा सञ्चालित राष्ट्रिय भिटामिन ‘ए’ तथा जुकाको औषधि वितरण अभियान अन्तर्गत यो शिविर सञ्चालन गरिएको हो।

काठमाडौंको कागेश्वरी मनोहरा नगरपालिका–९, काँडाघारीस्थित गान्धी अस्पतालमा सञ्चालित यस कार्यक्रमको पहिलो दिन ३ सय ३१ बालबालिकाले सेवा प्राप्त गरेका छन्। स्थानीय स्तरमा बालबालिकाको स्वास्थ्य पहुँच बढाउन र सरकारको अभियानलाई सहयोग पुर्‍याउने उद्देश्यले शिविरको आयोजना गरिएको आयोजकले जनाएको छ।

बालबालिकाको स्वास्थ्य र समुदायको सहभागिता

क्लबका अध्यक्ष राजनराज खनालले बालबालिकाको स्वास्थ्य र स्वस्थ भविष्य निर्माणका लागि यस्ता जनस्वास्थ्य अभियानमा समुदायको सक्रिय सहभागिता अति आवश्यक रहेको बताएका छन्। सरकारी स्वास्थ्य अभियानलाई सफल बनाउन क्लबले सहकार्य गरेको जानकारी दिँदै उनले सबै अभिभावकलाई आफ्ना बालबालिकालाई नियमित रूपमा भिटामिन ‘ए’ तथा जुकाको औषधि खुवाउन नजिकैको स्वास्थ्य केन्द्रमा लैजान विशेष आग्रह गरेका छन्।