📌 मुख्य बुँदाहरू:
- झापाको शिवसताक्षी–८ ढुंगेलचोकमा पटाका पड्काउने क्रममा आगलागी.
- मानबहादुर थापाको खेतमा रहेको धानको कुनिउँ जल्दा करिब एक लाख रुपैयाँ बराबरको क्षति.
- प्रहरी र स्थानीयको सहयोग तथा दमकलको प्रयोगबाट आगो पूर्ण रूपमा नियन्त्रणमा.
झापाको शिवसताक्षीमा बालबालिकाले पटाका पड्काउने क्रममा धानको कुनिउँमा आगलागी हुँदा लाखौँ रुपैयाँको क्षति भएको छ। बुधबार बिहान ११ः३० बजेको समयमा शिवसताक्षी नगरपालिका वडा नम्बर ८ ढुंगेलचोक निवासी मानबहादुर थापाको आफ्नै घरको पूर्वपट्टि रहेको एक बिघा खेतमा राखिएको धानको कुनिउँमा आगलागी भएको हो।
इलाका प्रहरी कार्यालय झिलझिलेका अनुसार केटाकेटीले पटाका पड्काउने क्रममा अचानक आगो सल्किँदा उक्त आगलागी भएको हो। घटनाबाट करिब एक लाख रुपैयाँ बराबरको क्षति भएको प्रहरीले जनाएको छ।
प्रहरी र दमकलको सक्रियतामा आगो नियन्त्रण
घटनालगत्तै बिहान इलाका प्रहरी कार्यालय झिलझिलेमा जानकारी प्राप्त भएपछि प्रहरी निरीक्षक महेन्द्र पराजुलीको कमाण्डमा ११ जनाको टोली तत्काल घटनास्थलमा खटिएको थियो। प्रहरी, शिवसताक्षी नगरपालिकाको दमकल र स्थानीय बासिन्दाहरूको संयुक्त प्रयासमा दिउँसो १२ः०५ बजे आगो पूर्ण रूपमा नियन्त्रणमा लिइएको थियो।
📄 प्रेस विज्ञप्ति / सूचना
