📌 मुख्य बुँदाहरू:
- वैदेशिक रोजगारीमा ठगी तथा संगठित अपराध गरेको आरोपमा पक्राउ परेका दुई पूर्वमन्त्रीसहित ६ जनालाई काठमाडौं जिल्ला अदालतले चार दिन हिरासतमा राखेर अनुसन्धान गर्न अनुमति दिएको छ।
- पक्राउ पर्नेमा तत्कालीन श्रम, रोजगार तथा सामाजिक सुरक्षामन्त्रीहरू शेरबहादुर कुँवर र रामेश्वर राय यादव तथा मन्त्रालयका तत्कालीन उच्च अधिकारीहरू रहेका छन्।
- प्रहरीको प्रारम्भिक अनुसन्धानबाट मलेसिया जाने करिब साढे सात लाख कामदारसँग साढे दुई अर्ब रकम असुलिएको र त्यसमध्ये ठूलो रकम बैंकिङ प्रणालीमार्फत मलेसिया पठाइएको खुलेको छ।
काठमाडौं । वैदेशिक रोजगारीका नाममा ठगी तथा संगठित अपराध गरेको आरोपमा पक्राउ परेका दुई पूर्वमन्त्रीसहित ६ जनालाई अदालतले चार दिन हिरासतमा राखेर अनुसन्धान गर्न अनुमति दिएको छ। नेपाल प्रहरीको केन्द्रीय अनुसन्धान ब्युरो (सीआईबी) को आग्रहमा काठमाडौं जिल्ला अदालतले बिहीबार उनीहरूमाथि अनुसन्धानका लागि सो समय थप गरेको हो।
पक्राउ पर्नेमा तत्कालीन श्रम, रोजगार तथा सामाजिक सुरक्षामन्त्रीद्वय शेरबहादुर कुँवर र रामेश्वर राय यादव रहेका छन्। त्यस्तै, मन्त्रालयका तत्कालीन सचिव विनोद केसी, तत्कालीन रोजगार व्यवस्थापन महाशाखा प्रमुखद्वय उमेश ढुंगाना र राजीव पोखरेल तथा मन्त्रालयकी तत्कालीन कानुन अधिकृत निर्मला गुरुङ पनि पक्राउ परेका छन्। यस मामिलामा तत्कालीन श्रमसचिव एकनारायण अर्यालविरुद्ध पनि पक्राउ पुर्जी जारी भइसकेको छ।
अतिरिक्त शुल्क असुली र विदेशी मुद्रा अपचलनको आरोप
नेपाल र मलेसिया सरकारबीच भएको समझदारी विपरीत वैदेशिक रोजगारीमा जाने कामदारबाट सरकारले तोकेको भन्दा अतिरिक्त शुल्क उठाइएको प्रहरीको आरोप छ। कामदारबाट अतिरिक्त एक सय रिङ्गिट उठाइएको तथा अधिकार क्षेत्र नाघेर अमेरिकी डलर र बेलायती पाउन्डमा रकम मलेसिया पठाउने निर्णयमा उनीहरूको संलग्नता रहेको सीआईबीले जनाएको छ। पदीय जिम्मेवारी दुरुपयोग गरी संगठित समूहलाई लाभ पुर्याएको र विदेशी मुद्रा अपचलन गराएको कसुरमा उनीहरूमाथि अनुसन्धान भइरहेको छ।
करोडौं रकम अवैध रूपमा मलेसिया पठाइएको खुलासा
प्रहरीको प्रारम्भिक अनुसन्धानबाट मलेसिया जाने करिब साढे सात लाख कामदारसँग साढे दुई अर्ब रुपैयाँभन्दा बढी रकम असुलिएको खुलेको छ। उक्त संकलित रकममध्ये एक अर्ब ६९ करोड दुई लाख २४ हजार रुपैयाँ श्रम मन्त्रालयका उच्चपदस्थ अधिकारीहरूको सहयोगमा बैंकिङ प्रणालीबाटै मलेसिया पठाइएको भेटिएको छ। यस विषयमा थप अनुसन्धान भइरहेको सीआईबीका प्रवक्ता तथा प्रहरी वरिष्ठ उपरीक्षक अनुपम शमशेर जबराले जानकारी दिएका छन्।




















