चक्रवात ‘अर्नब’को प्रभाव: कात्तिक १५ गतेसम्म भारी वर्षा र बाढीको उच्च जोखिम

बंगालको खाडीमा विकसित अति शक्तिशाली चक्रवात ‘अर्नब’को प्रभाव नेपालमा पर्न थालेको छ। सोही प्रणालीको प्रभावका कारण आगामी कात्तिक १५ गतेसम्म देशका विभिन्न नदी जलाधारहरूमा उल्लेखनीय वर्षा भई जलसतह बढ्ने पूर्वानुमान गरिएको छ। बाढी पूर्वानुमान महाशाखाले बाढी तथा अन्य जलजन्य जोखिम आकलनसम्बन्धी पूर्वसूचना जारी गर्दै सम्बन्धित क्षेत्रका बासिन्दाहरूलाई उच्च सतर्कता अपनाउन आग्रह गरेको छ।

महाशाखाका अनुसार चक्रवातको प्रभावले विशेषगरी नारायणी, बागमती, कमला, कन्काई र कोशी नदी जलाधार, तिनका उपजलाधार तथा आसपासका क्षेत्रहरूमा उल्लेखनीय वर्षा हुनेछ। हाल उक्त मौसमी प्रणाली कमजोर हुँदै न्यूनचापीय प्रणालीमा परिणत भइसकेको भए पनि यसको अप्रत्यक्ष प्रभावस्वरूप नेपालमा लगातार वर्षा र केही उच्च हिमाली क्षेत्रमा हिमपात हुन सक्ने मौसमविद्हरूले बताएका छन्। बिहीबार बिहानैदेखि कोशी प्रदेशका एक–दुई स्थानमा हल्का वर्षा भइरहेको छ भने देशका अन्य भूभागमा सामान्यदेखि पूर्णतया बदलीको अवस्था रहेको छ।

शुक्रबार सबैभन्दा बढी जोखिम, नदीहरूको जलसतह बढ्ने

पूर्वानुमान अनुसार बिहीबारदेखि नै प्रमुख नदी जलाधारहरूमा जलसतह सामान्य रूपमा बढ्न थालेको छ भने शुक्रबार कात्तिक १३ गते नारायणी, कोशी र तिनका शाखा नदीहरू तथा बागमती, कमला र कन्काई जलाधारमा मध्यमदेखि भारी वर्षाको सम्भावना छ। यसबाट ती क्षेत्रका नदीहरूमा जलसतह उल्लेख्य रूपमा बढ्ने र मध्यम जोखिम रहने आकलन गरिएको छ। यद्यपि, महाकाली, कर्णाली, पश्चिम राप्ती र बबई नदीमा भने जलसतह सामान्य मात्रै बढ्ने देखिएको छ।

नागरिकलाई सतर्क रहन प्रशासनको आग्रह

हालको प्रारम्भिक आकलनअनुसार प्रमुख नदीहरूमा जलसतह खतरा तहभन्दा माथि पुग्ने सम्भावना न्यून देखिए पनि वर्षाको वास्तविक मात्रा र स्थानीय मौसमको अवस्थाअनुसार जोखिमको स्तर परिवर्तन हुन सक्ने चेतावनी दिइएको छ। बाढी पूर्वानुमान महाशाखाले विशेषगरी शुक्रबार र शनिबार नदी किनारका बासिन्दा, पहाडी तथा चुरे क्षेत्रका यात्रा गर्ने यात्रुहरू र किसानहरूलाई बाढी, डुबान तथा आकस्मिक पहिरोको जोखिमबाट बच्न उच्च सावधानी अपनाउन अनुरोध गरेको छ।