मुस्ताङमा थोरङला पास गरेर फर्केका पथप्रदर्शकको मृत्यु

मनाङतर्फबाट राउन्ड अन्नपूर्ण चक्रीय पदमार्गको प्रसिद्ध थोरङला पास गरी मुस्ताङ आइपुगेका एक पथप्रदर्शकको मृत्यु भएको छ। सोलुखुम्बुको महाकुलुङ गाउँपालिका–३ का २७ वर्षीय लाक्चन्द्र कुलुङको उपचारका क्रममा बुधबार राति प्रदेश अस्पताल जोमसोममा निधन भएको हो।

जिल्ला प्रहरी कार्यालय मुस्ताङका सूचना अधिकारी तथा प्रहरी निरीक्षक ईश्वर महतका अनुसार मृतक कुलुङ हिमालयन हब एड्भेन्चर प्रालिमार्फत फ्रान्सका महिला पर्यटकलाई मार्गदर्शन गर्दै मनाङ हुँदै थोरङला पास गरी मुस्ताङको वारागुङ मुक्तिक्षेत्र गाउँपालिका–१, मुक्तिनाथ पुगेका थिए।

होटलको बाथरुममा अचेत फेला परेका कुलुङ

प्रहरीका अनुसार मुक्तिनाथस्थित एक होटलमा बाह्रौँ दिनको पदयात्रापछि बास बसेका कुलुङ नुहाउनका लागि बाथरुम गएका थिए। लामो समयसम्म बाहिर ननिस्किएपछि शङ्का लागेर होटल सञ्चालकले इलाका प्रहरी कार्यालय मुक्तिनाथमा खबर गरेका थिए।

खोजतलास गर्दा कुलुङ बाथरुममा अचेत अवस्थामा भेटिएका थिए। उनलाई तत्काल उद्धार गरी उपचारका लागि जोमसोमस्थित प्रदेश अस्पताल लगिएकोमा चिकित्सकले मृत घोषणा गरेका हुन्। घटनाबारे थप अनुसन्धान भइरहेको जिल्ला प्रहरी कार्यालय मुस्ताङले जनाएको छ।