लक्ष्मी उप्रेती
२ जेठ, मेचीनगर : विभिन्न कसुरमा पक्राउ तथा दुर्घटनामा परेका सवारीसाधन समयमा लिलाम नहुदाँ वा मुद्धा किनारा लाग्न नसक्दा यतिखेर झापाको मेचीनगरका विभिन्न सरकारी कार्यालय परिसरमा ती सवारी साधन कुहिने अवस्थामा पुगेका छन । समयमै ती सवारी साधन लिलामी हुन नसक्दा सरकारले करोडौं रुपैयाँ राजस्व घाटा व्योहोर्नु परेको छ । सम्बन्धित निकायले लिलामी गर्न नसक्दा सवारीसाधन थोत्रिने अवस्थामा पुगेका छन् भने कतिपयको पार्टपूर्जासमेत थोत्रा भएर कामै नलाग्ने अवस्थामा पुगेका छन् । करोडौं रुपैँयाँ राजस्वसमेत गुम्ने खतरा बढेको छ ।
चोरी पैठारीका बेला पक्राउ गरिएका , सवारी दुर्घटनामा परेका र विभिन्न कारवाहीका क्रममा जफत गरिएका ती सवारीसाधनको लिलाम प्रक्रिया झण्झटिलो भएका कारण र मुद्धा समयमै किनारा लाग्न नसक्दा करोडौंका सवारीसाधन कवाडी बन्ने अवस्थामा पुगेका मात्र छैनन् सरकारको लाखौं रुपैयाँ राजस्व समेत गुम्दैं गएको सरकारी अधिकारीहरुको भनाई छ ।
कार्यालय परिसरमा रहेका धेरै सवारी साधन त काम लाग्ने अवस्थामै छैनन् । क्षतिग्रस्त सवारी साधको क्षतिपूर्त पीडित पक्षले पाए पछि पुराना छाडेर जाने त्यसलाई प्रहरीले लिलामी गर्न पनि नपाउने भएकाले पनि यस्ता साधनको संख्या दैनिकरुपमा बढ्दो क्रममा रहेको कार्यालयको मुद्धा शाखाले जनाएको छ । कवाडीमा परिणत हुन लागेका सवारीसाधनहरु मध्ये सबैभन्दा बढी मोटरसाइकल नै छन् । कतिको आवश्यवक कागजात नभएको, कतिले बर्षौदेखि सवारी साधनको कर नबुझापाएको, कतिले समयमै नविकरण नगरेका,कति भारतीय नम्बर प्लेटका र दुर्घटनामा परेर सवारी धनीको मृत्यु भएकाले पनि ती साधन साधन बेवारिसे बनेका हुन । ती सवारी साधनको प्रक्रिया पुर्याएर कारवाही गर्ने प्रहरी नायव उपरीक्षक चापागाईँले बताए ।
अहिले कतिपय स्थानमा ती सवारीसाधन एकमाथि अर्को गर्दै राखिएका कारण माटोले पुरिने गरेको वारिपरीको झार जंगलले छोपिन गई कवाडीले पनि लैजान नमान्ने अवस्थामा पुगेको पाइएको छ । समयमै त्यस्ता सवारीसाधनका विषयले निकास नपाउँदा राजस्वमा असर पुग्दै आएको बताईएको छ । बर्षादमा पानीमा भिजेर दर्जनौ सवारी साधन नष्ट भएका छन ।सुरक्षित स्थानमा राख्ने गोदाम नहुदा घामपानीले सवारी साधन कवाडी हुँदै गएको बताइएको छ । जिल्लाका विभिन्न स्थान बाट नेपाल प्रहरी तथा सशस्त्र प्रहरीले बरामद गरेको सवारी साधन अलपत्र जस्तै बनेका छन् ।
जफत गरिएका सवारीसाधन लिलाम गर्नुपर्ने हुन्छ । सवारीसाधन थोत्रिँदा त्यसको लिलामीका लागि मूल्यांकन पनि घट्दै गइरहेको छ ।
