धनकुटा।पूर्वको पर्यटकीय स्थल भेडेटारमा ११ औं फुड फेस्टिबल आगामी पुस १५ गतेदेखि १७ गतेसम्म आयोजना गरिने भएको छ ।
राई, लिम्बू, मगर, गुरुङ, याम्फू, तामाङ, नेवारीलगायतका जातिका मौलिक खानाका परिकारसहित साहसिक खेल प्रवर्धन र नयाँ पर्यटकीय गन्तव्यको पहिचानमा फेस्टिबल केन्द्रित रहने पत्रकार सम्मेलनमा जानकारी दिइयो ।
होटल एशोसियसनको आयोजनामा हुने फेस्टिबलमा स्थानीय दर्जन बढी धार्मिक तथा पर्यटकीय स्थल पहिचान र प्रवर्धन गरी घुम्ने वातावरण तयार गरेको एशोसियसनका अध्यक्ष तुमराज लिम्बूले जानकारी दिए ।
कृषि प्रदर्शनी, जातीय मौलिक खानाका परिकार, हस्तकला घरेलु उत्पादन, फूल, नर्सरी, परम्परागत सांस्कृतिक झाँकी, माउन्टेन बाइक, प्याराग्लाइडिङ, स्थानीय तथा राष्ट्रिय कलाकारको सांस्कृतिक कार्यक्रमलगायतका आकर्षणसहित आयोजना हुने फेस्टिबलमा यो वर्ष जिपलाइन, स्काइ बृज र माउन्टेन बाइकलगायतका साहसिक खेल पर्यटनका गतिविधिसमेत आकर्षणका रूपमा प्रस्तुत हुनेछन् ।
