९ पुस, मेचीनगर : नेपाल पत्रकार महासंघ झापा शाखाले आफ्नो ३७औं स्थापना दिवस विविध कार्यक्रमका साथ मनाएको छ । बुधबार स्थापना दिवसका अवसरमा रक्तदान र महासंघ शाखाको विर्तामोडस्थित कार्यालयमा राष्ट्रिय तथा महासंघको झण्डा झण्डोत्तोलन तथा संक्षिप्त सभा कार्यक्रम गरी स्थापना दिवस मनाएको हो ।
नेपाल रेडक्रस सोसाइटि झापा शाखाको प्राविधिक सहयोग र नेपाल ब्लड डोनर्स सोसाइटिको सहकार्यमा आयोजित रक्तदान कार्यक्रममा ५५ जनाले रक्तदान गरेका थिए । कार्यक्रममा हल्दिबारी प्रेस क्लबका अध्यक्ष नेत्रविक्रम विमलीले समेत रक्तदान गरेका थिए । यो उनको १२०औँ पटक रक्तदान हो ।
झापामा रगतको अभाव देखिएको हुँदा मानवीय सेवामा टेवा पु¥याउने उद्देश्यले आफ्नो स्थापना दिवसलाई पत्रकार महासंघ झापाले रक्तदान कार्यक्रम गरेर मनाएको अध्यक्ष एकराज गिरीले बताए । कार्यक्रममा जनपद, स—शस्त्र प्रहरी, जेन–जी यूनाइटेड मुभमेन्ट नेपाल झापा, पत्रकार, विद्यार्थीलगायत उद्योगी व्यवसायी समेतले रक्तदान गरेका थिए ।
स्थापना दिवसकै अवसरमा महासंघको बिर्तामोडस्थित कार्यालय भवनमा झण्डोत्तोलन पनि गरिएको छ । महासंघका संस्थापक सचिव तथा पूर्व अध्यक्ष तारा बराल, पूर्व अध्यक्ष कृष्ण हुमागाईँ,अध्यक्ष एकराज गिरी, पदाधिकारी तथा सदस्यहरूको उपस्थितिमा राष्ट्रिय झण्डा र नेपाल पत्रकार महासंघको झण्डा झण्डोत्तोलन गरिएको हो । कार्यक्रममा महासंघका उपाध्यक्ष सुब्रत न्यौपानेले स्वागत मन्तव्य र सञ्चालन सचिव राजु पाठकले गरेका थिए ।
