📌 मुख्य बुँदाहरू:
- पीएचपी कोडिङ प्रणालीमा सुरक्षा जोखिम देखिएपछि सरकारी वेबसाइटहरू चार दिनदेखि लगातार बन्द छन्।
- बैंक तथा वित्तीय संस्थाहरूले समस्या समाधान गरी सेवा सुचारू गरे पनि सरकारी पोर्टलहरू अझै सञ्चालनमा आएका छैनन्।
- वेबसाइट बन्द हुँदा अनलाइनमार्फत सरकारी सेवा लिने सेवाग्राहीहरू प्रत्यक्ष रूपमा प्रभावित भएका छन्।
पीएचपी कोडिङ प्रणालीमा सुरक्षा जोखिम देखिएसँगै चार दिनदेखि बन्द रहेका सरकारी वेबसाइटहरू अझै सुचारू हुन सकेका छैनन्। साइबर सुरक्षालाई प्राथमिकतामा राख्दै सरकारले नै यी वेबसाइटहरू अस्थायी रूपमा बन्द गरेको हो।
तर, वेबसाइटहरू बन्द भएको चार दिन बितिसक्दा पनि ती कहिले खुल्ने भन्ने कुनै निश्चित टुंगो छैन। यसअघि पीएचपीमा सुरक्षा जोखिम देखिनेबित्तिकै नेपाल राष्ट्र बैंकसहित विभिन्न बैंक तथा वित्तीय संस्थाहरूले पनि आफ्ना वेबसाइट तथा अनलाइन सेवाहरू अस्थायी रूपमा बन्द गरेका थिए। तर, अधिकांश बैंक तथा वित्तीय संस्थाहरूले प्राविधिक समस्या समाधान गरेर आफ्नो सेवा सुचारू गरिसकेका छन्।
सेवाग्राहीहरू चरम मर्कामा
निजी क्षेत्र तथा बैंकहरूका वेबसाइटहरू सञ्चालनमा आइसकेको अवस्थामा समेत सरकारी वेबसाइटहरू भने अझै बन्द नै रहेका छन्। लामो समयसम्म सरकारी पोर्टलहरू बन्द रहँदा अनलाइनमार्फत विभिन्न सरकारी सेवा लिन चाहने आम नागरिकहरू चरम मारमा परेका छन्। सम्बन्धित निकायले समस्या समाधान गरी सेवा छिटोभन्दा छिटो सुचारू गर्नुपर्ने सर्वसाधारणको माग रहेको छ।
