चीन भ्रमण केवल घुमघाममा सीमित नहोस् : प्रधानमन्त्री शाह

काठमाडौँ । प्रधानमन्त्री बालेन्द्र शाहले चीन भ्रमणमा जान लागेका राष्ट्रिय स्वतन्त्र पार्टी (रास्वपा) का सांसदहरूसँग भेटवार्ता गर्दै भ्रमणलाई केवल पर्यटकीय घुमघाममा सीमित नराख्न निर्देशन दिएका छन्। शुक्रबार बिहान सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको उक्त छलफलमा चीन भ्रमणको तयारी, उठाइने एजेन्डा तथा नेपाल–चीन सम्बन्धका विविध पक्षमा विचारविमर्श भएको हो।

छलफलका क्रममा प्रधानमन्त्री शाहले नेपाल र चीनबीच विशिष्ट सम्बन्ध रहेको औंल्याउँदै त्यसलाई थप मजबुत बनाउन यो भ्रमण फलदायी हुने विश्वास व्यक्त गरे। रास्वपाका प्रमुख सचेतक कविन्द्र बुर्लाकोटीका अनुसार व्यापार, व्यवसाय, प्रविधि, पर्यटन र कृषि लगायतका क्षेत्रमा चीनसँग सहकार्य विस्तार गरी नेपालले अधिकतम लाभ लिनुपर्नेमा प्रधानमन्त्रीको विशेष जोड थियो। दुई देशबीचको कूटनीतिक सम्बन्ध, आर्थिक साझेदारी र विकासका सम्भावनासँग गाँसिएको यो भ्रमणबाट नेपालले चीनको प्रविधि र आर्थिक विकासको अनुभवबाट लाभ लिन सक्नुपर्ने उनको भनाइ थियो।

२० सदस्यीय प्रतिनिधिमण्डल आगामी आइतबार प्रस्थान गर्दै

रास्वपाका महामन्त्री विपिनकुमार आचार्यको नेतृत्वमा २० सदस्यीय संसदीय प्रतिनिधिमण्डल आगामी आइतबार चीन प्रस्थान गर्ने कार्यक्रम तय भएको छ। चिनियाँ कम्युनिस्ट पार्टी (सीपीसी) को निमन्त्रणामा हुन लागेको यस १० दिने भ्रमणका क्रममा प्रतिनिधिमण्डलले बेइजिङ, हाङचोउ र सिचुवानलगायत स्थानको भ्रमण गर्नेछ।

भ्रमणका क्रममा सुशासन, आर्थिक विकास, सरकारी सेवा प्रवाह, संस्थागत क्षमता अभिवृद्धि तथा नेपाल–चीन सम्बन्धका विविध पक्षमा अनुभव आदानप्रदान गरिने बताइएको छ। प्रतिनिधिमण्डलमा महामन्त्री आचार्यसहित सहमहामन्त्री हरि ढकाल, संसदीय दलका उपनेता गणेश पराजुली, प्रमुख सचेतक कविन्द्र बुर्लाकोटी लगायतका सांसदहरू सहभागिता रहनेछन्। पार्टी तहको भ्रमण भएकाले सीमा विवादबारे छलफल नहुने तर नेपालको सीमासम्बन्धी अडान यथावत् रहेको रास्वपाले स्पष्ट पारेको छ।