📌 मुख्य बुँदाहरू:
- नायक राजेश हमालले अर्थमन्त्री डा. स्वर्णिम वाग्लेको भारतप्रतिको अभिव्यक्तिलाई 'चाप्लुसीपूर्ण प्रस्तुति' भन्दै कडा आलोचना गरेका छन्।
- अर्थमन्त्रीले आफ्नो पदीय दायरा नाघेको र नेपालको लामो समयदेखिको परराष्ट्र नीतिको आधारलाई विकृत पार्ने जोखिम मोलेको हमालको आरोप छ।
- नयाँ दिल्लीमा आयोजित एनडीटीभी वर्ल्ड समिटमा अर्थमन्त्री वाग्लेले 'नेपालमा भारतविरोधी राष्ट्रवादको युग सकियो' भन्ने अभिव्यक्ति दिएका थिए।
नायक राजेश हमालले अर्थमन्त्री डा. स्वर्णिम वाग्लेको हालैको भारत भ्रमणका क्रममा दिएको अभिव्यक्तिको कडा शब्दमा आलोचना गरेका छन्। अर्थमन्त्री वाग्लेको उक्त अभिव्यक्तिलाई ‘चाप्लुसीपूर्ण प्रस्तुति’ भन्दै हमालले यसले नेपालको सार्वभौमसत्ता र परराष्ट्र नीतिको गरिमामा आँच पुर्याएको बताएका छन्।
अर्थमन्त्रीले आफ्नो पदीय मर्यादा र दायरा नाघेको उल्लेख गर्दै हमालले नेपालको लामो समयदेखिको परराष्ट्र नीतिको आधारलाई नै विकृत पार्ने जोखिम मोलेर त्यस्तो अभिव्यक्ति दिएको आरोप लगाएका छन्। सामाजिक सञ्जालमार्फत आफ्नो धारणा सार्वजनिक गर्दै उनले यस्तो प्रवृत्तिले दुई देशबीचको सम्बन्धलाई नै उपहास गर्ने जिकिर गरे।
परराष्ट्र नीतिमा व्यक्तिगत विवेकको प्रयोग नगर्न सुझाव
परराष्ट्र नीति कुनै पनि व्यक्तिको व्यक्तिगत विवेक वा राजनीतिक सुविधवादको विषय बन्न नहुने हमालको ठम्यााइ छ। नेपाल–भारत सम्बन्ध इतिहास, भूगोल र जनस्तरको सम्बन्धमा गहिरो रूपमा जोडिएको भए पनि यसलाई कमजोर बनाउने वा व्यक्तिगत चाकरीको विषय बनाउन नहुने उनले बताएका छन्।
"कुनै पनि पदमा बसेको व्यक्तिले नेपालको अन्तर्राष्ट्रिय कदलाई कमजोर पार्ने बयान वा सर्तहरू मार्फत यी आधारहरूसँग सम्झौता गर्नु हुँदैन," हमालले भनेका छन्। उनले छिमेकी देशहरूसँग बलियो सम्बन्ध बनाउने हरेक इमानदार प्रयासको स्वागत गर्नुपर्ने तर प्रतिनिधिहरूबाट परिपक्व कूटनीतिक विवेकको अपेक्षा गरिने बताएका छन्।
