मेचीनगर,माघ ७ गते । मेचीनगरको काँकरभिट्टामा जारी स्व.अर्जुन तामाङ स्मृति खुल्ला नकआउट ‘नाईन साइड ‘ फुटबल प्रतियोगिताको बुधबार सम्पन्न अन्तिम सेमीफाईनलमा डीवाईपी फुटबल क्लब डुँडामारीले गार्डेन फुटबल क्लब ,धरान विरूद्द सनसनीपूर्ण जीत निकालेको छ ।
डुँडामारीले धरानलाई ५–१ गोलको फराकिलो अन्तरले पराजित गर्दै अन्तिम दुईमा आफ्नो स्थान पक्का पारेको हो । यो जीतसँगै फाइनल खेलको समीकरण पूरा भएको छ । अब फाईनल खेलमा डुँडामारी फुटबल क्लबले शिवसताक्षी धाम फुटबल क्लबसँग उपाधिको लागि माघ ९ गते प्रतिष्पर्धा गर्ने छ ।
मेचीनगर–६ स्थित तुर्केनी खेल मैदानमा आज भएको प्रतियोगितामा डुँडामारी एफसीले उत्कृष्ट खेल प्रदर्शन गरेको थियो । डुँडामारी एफसी तर्फबाट मनिष लिम्बुले ह्याट्रिक गरे । त्यसैगरी सन्जोक मगर र सुमन लिम्बुले १/१ गोल गर्दै टिमलाई विजयी बनाए । पराजित गार्डेन फुटबल क्लबले डुँडामारी एफसीका तर्फबाट सुसाइड गोल मार्फत् उपहार स्वरुप १ गोल पायो ।
खेलको ‘ म्यान अफ द म्याच’ डुँडामारी एफसीका मनिस लिम्बु घोषित भए । । उनलाई नेपाल राष्ट्रिय ढुवानी सेवाका केन्द्रीय सदस्य श्याम प्रसाईले नगद सहित ट्रफि प्रदान गरे ।
प्रतियोगिताको फाईनल खेल शिवसताक्षी धाम फुटबल क्लब र डुँडामारी फुटबल क्लब बिच दिनको १ः३० बजे हुने आयोजकका सल्लाहकार डिल्लिराम अधिकारीले जानकारी दिए ।
तुर्केनी फुटबल क्लवको आयोजनामा माघ २ गते बाट सञ्चालन भई माघ ९ गते समापन हुने खेलमा गोल्डकपको विजेताले नगद रु.५० हजार र उपविजेताले २५ हजार नगदसहित ट्रफी पाउने छन् ।
