सुर्खेत । चीनले नेपाली भूमि अतिक्रमण गरेर भवन निर्माण गरिएको क्षेत्रमा निरीक्षण गर्न नेपाली टोली खटिएको छ । हुम्लाका प्रमुख जिल्ला अधिकारी (प्रजिअ) चिरञ्जीवी गिरीको नेतृत्वमा शनिबार अनुगमन टोली नाम्खा गाउँपालिका-६, लिमीतर्फ गएको सहायक प्रमुख जिल्ला अधिकारी दत्तराज हमालले जानकारी दिए ।
टोलीमा नेपाली सेना, सशस्त्र प्रहरी, नेपाल प्रहरी, राष्ट्रिय अनुसन्धान र गाउँपालिकाका अध्यक्ष लगायत छन् । टोलीले स्थलगत अध्ययनका लागि गएको सहायक प्रजिअ हमाल बताउँछन् ।
नेपाली भूमि लिमीको लाप्चा बगरमा चीनले नौ वटा भवन निर्माण गरेको हुम्लाका सहायक प्रमुख जिल्ला अधिकारी दत्तराज हमालले जानकारी दिए ।
केही दिन अगाडि मात्रै स्थलगत अनुगमन गरेर आएका हमालले दुई देशको सिमानाभन्दा झण्डै दुई किलोमिटर यता नेपाली भूभागमा चिनियाँ पक्षले एकतर्फी रुपमा भवन निर्माण गरेको बताए ।
नेपाली भूभागमा बनेका ती भवन कुन प्रयोजनाका लागि बनेको हो भन्ने नखुलेको उनको भनाइ छ । ‘चिनियाँ पक्षको जिम्मेवार व्यक्तिसँग हामीले बुझन खोज्यौ तर हामीलाई त्यहाँ जान दिइएन,टाढैबाट फोटो खिचेर फर्कियौं’, हमालले अनलाइनखबरसँग भने ।
भवन निर्माण भएको ठाउँभन्दा झण्डै दुई किलोमिटर अगाडि डाँडामा १२ नम्बर सीमास्तम्भ रहेको छ । तर त्योसँगै रहेको ११ नम्बर सीमास्तम्भ भने हराएको सहायक प्रजिअ हमालले बताए ।
पुरानै घाउ
यसअघि २०६६ सालमा पनि सोही ठाउँमा चिनियाँ पक्षले तीनवटा भवन निर्माण गरेको र पछि विरोध भएपछि निर्माण कार्य रोकिएको नाम्खा गाउँपालिकाका प्रमुख प्रशासकीय अधिकृत धर्मराज न्यौपानेले बताए ।
‘यो समस्या आजको नभइ धेरै पुरानौ रैछ । हामी अनुगमनमा जादाँ स्थानीयले त्यहाँ जान दिएनन् । स्थानीयले त्यहाँको प्रहरीले जान दिदैन भनेपछि हामी वारिबाटै फर्कियौ’ न्यौपाने भन्छन् ।
नयाँ नौ वटा ब्लग निर्माण गरेर फिनिसिङको काम भै रहेको प्रमुख प्रशासकीय अधिकृत न्यौपान बताउँछन् । उनका अनुसार सो क्षेत्र नेपाली भूभाग भएपनि चिनियाँ सुरक्षाकर्मीले नेपालीलाई प्रवेश गर्न नदिएको स्थानीयको गुनासो छ । त्यहाँ चिनियाँ सुरक्षाकर्मीका गाडी भने ओहोरदोहोर गरिरहन्छन् ।
सहायक प्रजिअ हमालको नेतृत्वमा नाम्खा गाउँपालिकाका अध्यक्ष विष्णुबहादुर तामाङ (लामा) र गाउँपालिकाका प्रमुख प्रशासकीय अधिकृत न्यौपानेसहितको टोली भदौ १४ गते स्थलगत अनुगमन गरी १९ गते फर्केका थिए ।
