Monday, June 21, 2021
- बिज्ञापन -
गृह राष्ट्रियसाढे ७ लाखको स्रोत नखुल्दा बलेविरुद्ध २० करोडको सम्पत्ति शुद्धीकरण मुद्दा

साढे ७ लाखको स्रोत नखुल्दा बलेविरुद्ध २० करोडको सम्पत्ति शुद्धीकरण मुद्दा

काठमाडौं । जुवा खालबाट पक्राउ परेका बले भनेर चिनिने गुन्‍डा नाइके रामप्रसाद सापकोटाविरुद्ध विशेष अदालतमा सम्पत्ति शुद्धीकरणको मुद्दा दायर भएको छ । जुवाखालमा भेटिएको ७ लाख रुपैयाँको स्रोत नखुल्दा उनी सम्पत्ति शुद्धीकरण विभागको अनुसन्धानमा तानिएका हुन् ।

विभागले विशेष अदालतमा दायर गरेको सम्पत्ति शुद्धीकरणको मुद्दामा सापकोटामाथि १७ करोड ५२ लाख ७७ हजार २ सय ६० करोड बिगो कायम गरी जरिवाना र कैद गर्न माग गरिएको छ । ‘क्यासिनो किङ’ भनेर चिनिने सापकोटा ०७६ कात्तिक १० गते महाराजगन्जमा विक्रम गौतमको घरमा अवैध जुवा कौडा खालबाट २५ जनासँगै पक्राउ परेका थिए । महानगरीय प्रहरी वृत्त महाराजगन्जले साङ्बु शेर्पा नामको तीन लाखको चेक, कौडा ३२ थान र ४ बुक ताससहित सापकोटालाई पक्राउ गरेको थियो । त्यसको ५ दिनपछि कात्तिक १५ गते महानगरीय प्रहरी वृत्तले सम्पत्ति शुद्धीकरणमा उजुरीपत्र दायर गरेको थियो ।

प्रहरीसँग बयानका क्रममा सापकोटाले सात लाख ४० हजार आफ्नो साथबाट बरामद भएकामा ४० हजार मात्र आफ्नो भएको बताएका थिए । ४० हजार तलबबापतको रकम भएको बताएका सापकोटाले पछि बयान फेर्दै सात लाख भने आफ्नो नभएको बयान दिएका थिए । ‘‘उक्त जुवा मुद्दामा बयान हुँदाका दिन हतार-हतार भएको र सोही क्रममा बयान राम्रोसँग नपढी दस्तखत गरेको थिएँ,’’ सापकोटाले पछिल्लो बयानमा भनेका छन् ।

सापकोटाको इन्भेष्टमेन्ट बैंकमा रहेको ४ लाख ५५ हजार ८ सय ७७ रुपैयाँ, उम्प्लिफाइट इन्टरटेनमेन्ट प्रालिको सेयर पुँजीमा चुक्ता भएको रकम १५ लाख, २५ लाख, १२ करोड २६ लाख ७२ हजार र पञ्‍चकन्या हाउजिङको सवारी धनी रहेको र कक्षपतिको नामबाट नामसारी भएको भक्सवेगन, भेन्टो, प्राइभेट कार जफत गर्न पनि माग गरिएको छ ।

त्यस्तै, झापा मेचीनगर १३ मा निर्माणाधीन क्यासिनोसहितको प्रस्तावित पाँचतारे होटलको सापकोटाको नाममा रहेको ४० प्रतिशत सेयर स्वामित्व कायम रहेको भन्दै सो पनि सम्पत्ति शुद्धीकरण कसुर अपराध भएको पुष्टि भएको विभागले दायर गरेका मुद्दामा जनाइएको छ । त्यस्तै, मेची नगरपालिका १३ मै २ तले घर र ०७३ सालमा खरिद गरेको ४१ लाखको गाडी पनि कसुरजन्य कार्यबाट आर्जित रकमबाट खरिद गरेकाले सम्पत्ति शुद्धीकरण अपराध गरेको भन्दै जफत गर्नुपर्ने जिकिर गरिएको छ ।

सापकोटाकी श्रीमतीविरुद्ध पनि मुद्दा
सापकोटासँगै उनको श्रीमती सिर्जना कक्षपतिको नाममा रहेको सम्पत्तिको पनि स्रोत नखुलेको सम्पत्ति शुद्धीकरण विभागले जनाएको छ । कक्षपतिको नाममा रहेको सम्पत्तिको पनि स्रोत नखुलेको विभागको अनुसन्धानबाट खुलेको छ । विभागले दायर गरेको मुद्दामा कक्षपतिविरुद्ध २ करोड ५८ लाख ६४ हजार ७ सय ४७ रुपैयाँ विगो कायम गर्न माग गरिएको स्रोतको दाबी छ

लगानी अनुपातमा कर तिरेको देखिएन 
सापकोटाले विभिन्‍न कम्पनीमा लगानी गरेका छन् । तर, उनले लगानी अनुपातमा सरकारलाई कुनै कर, राजस्व तिरेको नदेखिएको विभागले दायर गरेको मुद्दामा उल्लेख छ ।

क्यासिनो रोयलमा गैरकानुनी किसिमले टेबल सञ्‍चालन गरेको, श्रीमतीको नाममा खाता खोली काठमाडौं र पोखराका क्यासिनोसँग कारोबार गर्ने गरेको विभाको अनुसन्धानमा देखिएको छ । त्यस्तो कारोबार सापकोटाकी पत्नी कक्षपतिको नेपाल इन्भेष्टमेन्ट बैंकको खाता विवरणबाट देखिएको मुद्दामा उल्लेख छ ।

सम्बन्धित अन्य समाचारहरु

Leave a Reply

- बिज्ञापन -

लोकप्रिय समाचारहरु