१२ जेठ, काठमाडौँ : नेकपा एमालेका अध्यक्ष केपी शर्मा ओलीले आफूलाई भ्रष्टाचार गर्न आवश्यक नरहेको बताएका छन्।
बिहीबार संसदमा सरकारको नीति तथा कार्यक्रममाथिको छलफलमा भाग लिँदै ओलीले आफू र श्रीमतीको सम्पत्ती राज्यलाई हस्तान्तरण गरिसकेको अवस्थामा पनि आफूमाथि भ्रष्टाचारको आरोप लगाउनु गलत रहेको बताए।
‘मेरो बारेमा भ्रष्टाचारको चर्चा गर्ने नेताहरुलाई चुनौती दिन चाहन्छु । मैले सम्पूर्ण चल अचल सम्पत्ती राज्यका नाममा गरेको छु । मैले आफ्नो सम्पत्ती राज्यका लागि ल्याइदिन भ्रष्टाचार गर्नुपर्ने ? के का लागि भ्रष्टाचार गर्ने ?,’ ओलीले प्रश्न गरे।
उनले आफूमाथि औँला ठड्याउनेलाई व्यक्तिगत सम्पत्ती राज्यका नाममा हस्तान्तरण गर्न चुनौती दिएका छन् । ‘म माथि औँला ठड्याउनुभन्दा अगाडि कुनै महानुभाव निस्कनुस न राज्यको नाममा सम्पत्ती हस्तान्तरण गर्ने,’ उनले भने ।
सम्पत्तीको लोभ गर्नुपर्ने कारणै नभएको पनि ओलीले बताए । ‘मैले सम्पत्तीमा लोभ गर्नुपर्ने, अर्काको नाममा सम्पत्ती राखेर म आफू बदनाम हुनुपर्ने कुनै कारण छैन। आफू नखानेले अर्कालाई किन खुवाउँछ ?,’ उनले भने, ‘ केपी ओलीलाई मुखभरीको जवाफ दिन भएपनि राज्यको नाममा सम्पत्ती हस्तान्तरणको घोषणा गर्नुस् त। यही संसदबाट गर्नुस् । घुमाइफिराइ मलाई छेड हान्नुहुन्छ ।’
