Wednesday, April 21, 2021
- बिज्ञापन -
गृह अर्थ / वाणिज्यझापामा किसानले माघमा नै धान रोपे

झापामा किसानले माघमा नै धान रोपे

दमक, फागुन ३ गते । अन्नको भण्डार भनेर चिनिएको झापामा माघ/फागुनमा नै धान रोप्ने काम शुरु भएको छ । पछिल्लो समयमा जिल्लामा तीन बालीसम्म किसानले धान लगाउन थालेका छन् भने नयाँ प्रविधिको प्रयोग बढ्दो अवस्थामा छ ।

उत्पादन लागत कम गर्ने र तीनपटक सम्म धान वाली लगाउन किसानहरु तत्पर देखिएपछि यसले उत्पादनको क्षेत्रमा सकारत्मक प्रभाव पार्ने बताईएको छ । प्रधानमन्त्री कृषि आधुनिकरण परियोजना अन्तर्गत धान सुपरजोन कार्यक्रम लागु भएसंगै किसानहरु बोरो धान खेतीतर्फ आकर्षित बन्दै गको पाईन्छ ।

चक्लाबन्दी खेती पकेट योजना अन्तर्गत कचनकवल ४ फेर्कागाछीमा रहेको हरित कृषक समुहमार्फत अहिले धान रोपाई भएको हो । राईस प्लान्टर (धान रोप्ने मेसीन) बाट धान रोप्नका लागि त्यसै अनुसारको धानको बीउ तयार पारेर समुहले धान रोपेको हो । परम्परागत रुपमा बीउ राखेर र प्लान्टरका लागि बेग्लै बीउ राखेर बोरो धान लगाईएको समुहका अध्यक्ष कनयैलाल गणेशले बताउनुभयो ।
प्रधानमन्त्री कृषि आधुनिकरण परियोजना, परियोजना कार्यान्वयन एकाइमार्फत १ सय २० हेक्टरभन्दा बढी क्षेत्रमा बोरो धान खेती भएको परियोजना कार्यान्वयन एकाइ प्रमुख रवीन्द्र सुबेदीले बताउनुभयो । मंसिर महिनामा बीउ राख्ने र माघ अन्तिम सातासम्म रोप्ने कार्य भएको उहाँको भनाइ  छ ।

बोरो धान खेतीको उदेश्य सकेसम्म तीनबाली लगाउन भएको पनि सुबेदीको भनाई रहेको छ । सुपरजोन क्षेत्रमा सिँचाईका लागि सोलार प्रणाली जडान भएको क्षेत्रमा बिशेष गरेर बोरो धान रोपाई भएको छ । चैते धान भन्दा अघि बीउ राखेर धान रोपिएको अवस्थामा यसलाई बोरो भनिदै आएको छ । चैते धान रोप्नका लागि बीउ राख्ने समय फागुन दोश्रो सातादेखि शुरु हुन्छ ।

झापा जिल्लामा कार्यान्वयनमा आएको धान सुपरजोन क्षेत्रको पूर्वाधार स्थिति, उत्पादन तथा उत्पादकत्व स्थिति, यान्त्रिकरण, प्रशोधन तथा बजारीकरणको स्थिति साथै आवश्यक प्रविधि तथा उत्पादन सामाग्रीको स्थिति र कृषकले अवलम्बन गरको प्रविधिलाई दिगोपना तथा प्रतिस्पर्धाका स्थितिका आधारमा करिब ५ सय हेक्टरभन्दा बढी धानको क्षेत्रफल ढाक्ने गरि धान सुपरजोन ४ वर्षअघि स्थापना भएको थियो ।

कचनकवल सहित केहि क्षेत्र समेटेर शुरु भएको धान सुपरजोन अहिले जिल्लाभर ४१ सय हेक्टर क्षेत्रफल विस्तार भएको पनि सुबेदीले बताउनुभयो । सोसँगै जिल्लामा बोरो खेतीको सम्भवाना पनि बढेको उहाँको भनाई छ । पुरानो धान सुपरजोन क्षेत्रभित्र बोरो खेती बढि गरेको देखिन्छ, उहाँले भन्नुभयो ।

सम्बन्धित अन्य समाचारहरु

Leave a Reply

- बिज्ञापन -

लोकप्रिय समाचारहरु