काठमाडौँ | आन्तरिक वायुसेवा सञ्चालकहरुको छाता संगठन (वायुसेवा सञ्चालक संघ) ले कोभिड–१९ को संक्रमण जोखिमको कारण देखाउँदै आन्तरिक उडान रोक्ने संसारभरमै नेपालमात्रै एउटा मुलुकमात्र बाँकी रहेको जनाएको छ ।
संघका प्रवक्ता योगराज कँडेलले हाल संसारभर स्वास्थ्य प्रोटोकल पालना गर्दै आन्तरिक उडान सुचारु भइसक्दा पनि नेपालमा अझै खुला नभइसकेको बताए ।
पटक–पटक आन्तरिक उडान सूचारुको निर्णय हुने फेरि स्थगन हुने क्रम चलिरहेका बेला संघले मंगलबार पुन: उडान सूचारुका लागि दबाबमूलक विज्ञप्ती जारी गर्दै ५ महिनादेखि बन्द रहेको नियमित आन्तरिक उडानलाई असोज १ बाट जसरी पनि सूचारु गराउनु पर्ने माग राखेको छ ।
संघका अध्यक्ष रामेश्वर थापाले मंगलबार पर्यटनमन्त्री योगेश भट्टराई र नागरिक उड्डयन प्राधिकरणलाई लेखेको पत्रले, ‘असोज १ गतेदेखि आन्तरिक उडान सुचारु गराउन माग राख्दै अन्य मुलुकहरुबाट पनि जहाजको यात्रा संक्रमणरहित र सुरक्षित हुने प्रमाणित भइसको’ दाबी गरेको छ । उडान सञ्चालन नहुँदा व्यवसायीहरुको विभिन्न शीर्षकमा व्ययभार बढिरहेको जनाएका छन् ।
‘संसारमा यति लामो लकडाउन र आन्तरिक उडान रोक्ने हाम्रो देशमात्रै हो,’ बुद्ध एयरका प्रबन्ध निर्देशक वीरेन्द्र बहादुर बस्नेतले कान्तिपुरसँग भने, ‘संसारभर सप्पै सेक्टर स्वास्थ्य मापदण्ड अनुसार खुला भइसकेका छन् । हाम्रो सरकारले यातायात क्षेत्र रोकेर अर्थतन्त्रलाई झन अप्ठ्यारो अवस्थामा पुर्याउँदै बेरोजगारी र गरिबी बढाइरहेको छ ।’
हालै पर्यटन मन्त्री भट्टराईले र पर्यटन व्यवसायीहरुबीच भएको वेभिनारमा असोजदेखि हिमाली तथा दुर्गम भेगबाट उडान सुचारु गर्ने प्रतिबद्धता जनाएका थिए ।
पर्यटन मन्त्रीको भनाइले व्यवसायीहरुले आफूहरु उत्साही भएको जनाउँदै प्राधिकरणले जारी गरेको कोभिड –१९ सुरक्षा निर्देशिका अनुसार तालिम र पूर्व अभ्यास पनि भइरहेको जनाएका छन् ।
यसअघि नागरिक उड्डयन प्राधिकरणले भदौ १ गतेदेखि २५ प्रतिशत अन्तर्राष्ट्रिय र ३३ प्रतिशत आन्तरिक उडान सञ्चालन गर्ने तयारी गरेको थियो । तर, संक्रमण र मृत्यु दर बढेको कारण देखाउँदै सरकारले आन्तरिक उडानमा चैत ११ गतेदेखि लगाइएको उडान प्रतिबन्ध यथावत नै राखेको छ भने भदौ १६ देखि सशर्त केहि अन्तर्राष्ट्रिय उडान खुला गरिसकेको छ ।
साभार: कान्तिपुर
