१२ जेठ, कामाण्डौं। नेकपा (एमाले)का कारबाहीमा परेका झलनाथ खनाल, माधवकुमार नेपालसहित १५ जना नेताहरूले सामूहिक वक्तव्य निकालेर प्रधानमन्त्री केपी शर्मा ओलीका पछिल्ला कदमविरुद्ध एकजुट हुन आग्रह गरेका छन् ।
संसद् विघटनविरुद्ध अदालत जान आनाकारी गरेका योगेश भट्टराई र गोकर्ण विष्ट ओलीविरुद्धको संघर्ष आह्वानमा उभिएका छन् ।
पछिल्लो समय एमालेका निवर्तमान सचिवसमेत रहेका योगेश भट्टराई पार्टी मिलाउन सक्रिय रहेका थिए । काठमाडौंका याक एण्ड यति होटलमा अबेर रातिसम्म पार्टी विवाद साँघुर्याउने विषयमा छलफल भएको थियो ।
तर, भोलिपल्ट मध्याह्न नहुँदै भाँडिएको थियो । त्यो दिन दुवै पक्षलाई छलफलमा बस्ने वातावरण बनाउन योगेशले पनि भूमिका खेलेका थिए ।
वरिष्ठ नेता झलनाथ खनाल, माधवकुमार नेपालसहित २६ सांसद कांग्रेस सभापति शेरबहादुर देउवालाई प्रधानमन्त्री बनाउन तयार हुँदै गठबन्धनका पक्षमा उभिँदा योगेशले शीतल निवास जानु वाञ्छनीय ठानेका थिएनन् ।
“मेरो राजनीतिक जीवनकै सबैभन्दा कठिन दिन आज । नेकपा एमालेको एकतालाई जोगाउन सकिन्छ कि भन्ने आशाले मैले आजको निर्णय लिएको हुँ । सही गरेंकी, गलत गरें इतिहासको कठोर मूल्याङ्कनमा खडा छु,” नेपालसहितका नेता शीतल निवासबाट फर्किएपछि योगेश भट्टराईले फेसबुकमा लेखेका थिए ।
यता गोकर्ण विष्ट पनि पछिल्लो समय पार्टी मिलाउन नै केन्द्रित थिए । कार्यदलमार्फत् विवाद साँघु¥याउनुपर्ने उनको भनाइ थियो । र त, उनी राष्ट्रपति विद्यादेपी भण्डारीको आह्वानअनुसार विपक्षी गठबन्धनका नेता देउवालाई प्रधानमन्त्री प्रस्ताव गर्दै शीतल निवास जान र संसद् विघटनविरुद्ध अदालत जान दुवैतिर छलिएका थिए ।
तर, आज दुवै नेता ओलीविरुद्धको मोर्चामा जोडिएका छन् । आजको वक्तव्यले खनाल–नेपाल समूहका सबै स्थायी कमिटी सदस्य एक ठाउँमा उभिएको सन्देश दिएको नेताहरूले बताएका छन् ।
१२ खरीबाट
