मेचीनगर, जेठ २९: विश्व बालश्रम विरुद्धको दिवसको अवसरमा झापाको मेचीनगर नगरपालिका–६, काँकरभिट्टा बसपार्क क्षेत्रमा जिङ्गल तथा पर्चा पम्पलेट वितरण कार्यक्रम सम्पन्न भएको छ। समुदाय-प्रहरी साझेदारी कार्यक्रमअन्तर्गत इलाका प्रहरी कार्यालय (इप्रका) काँकरभिट्टाको आयोजनामा यो कार्यक्रम गरिएको हो।
प्रहरी नायब निरीक्षक (प्रनानि) मिलन कुमारी राईको कमाण्डमा खटिएको प्रहरी टोलीले बुधबार (आज) बसपार्क एरियाका होटल तथा पसलहरूमा बालश्रम विरुद्धको दिवससम्बन्धी पर्चा पम्पलेट वितरण गरेको थियो। यसका साथै, बजार एरियामा बालश्रम विरुद्धको सन्देशमूलक जिङ्गल बजाएर परिक्रमा पनि गरिएको थियो।
यस कार्यक्रमको मुख्य उद्देश्य बालश्रमको न्यूनीकरण तथा उन्मूलनका लागि जनचेतना फैलाउनु हो। बालश्रमले बालबालिकाको शिक्षा, स्वास्थ्य र भविष्यमा नकारात्मक असर पार्ने भएकाले यस्ता जनचेतनामूलक कार्यक्रमहरू महत्त्वपूर्ण मानिन्छन्। स्थानीय प्रहरीले समुदायसँगको सहकार्यमा बालश्रम मुक्त समाज निर्माणका लागि सक्रिय भूमिका खेलेको यो एउटा उदाहरण हो। आगामी दिनमा पनि यस्ता अभियानलाई निरन्तरता दिँदै बालश्रममुक्त समाज निर्माणमा सबैको साथ र सहयोग आवश्यक देखिन्छ।
