📌 Key Takeaways:
- अछाम सदरमुकाम मङ्गलसेनलाई ग्रामीण क्षेत्रसँग जोड्ने १० किलोमिटर रणनीतिक सडकको ठेक्का रद्द गरिएको छ।
- म्याद थप गर्दा समेत भौतिक प्रगति १९.८३ प्रतिशत मात्रै भएपछि पूर्वाधार विकास मन्त्रालयअन्तर्गतको सडक डिभिजन कार्यालय साँफेबगरले यो निर्णय लिएको हो।
- कार्यालयले निर्माण व्यवसायीबाट ३८ करोड २३ लाख ९६ हजार ४९३ रूपैयाँ दाखिला गर्न पत्राचार गरेको छ।
- यससँगै २०७६ सालदेखि अलपत्र परेका अन्य पाँचसहित कुल छ वटा रुग्ण ठेक्काहरू औपचारिक रूपमा अन्त्य गरिएको छ।
अछाम सदरमुकाम मङ्गलसेनसँग ग्रामीण क्षेत्र जोड्ने निर्वाचन क्षेत्र रणनीतिक सडक खण्डको काम समयमा सम्पन्न नगर्ने निर्माण व्यवसायीको ठेक्का तोडिएको छ। पूर्वाधार विकास मन्त्रालयअन्तर्गत सडक डिभिजन कार्यालय साँफेबगरले लामो समयसम्म काम अलपत्र पार्ने निर्माण कम्पनीमाथि कडा कारबाही गर्दै ठेक्का खारेज गरेको हो।
विसं २०७९ वैशाख १६ गते ठेक्का सम्झौता भई सुरु भएको १० किलोमिटर लम्बाइको यस सडकखण्डको काम २०८२ वैशाख १६ गतेभित्र सम्पन्न गरिसक्ने समयसीमा तोकिएको थियो। निर्धारित मितिमा काम नसकिएपछि २०८३ वैशाख १६ सम्म म्याद थप गरिएको थियो। तर, थप गरिएको अवधिमा समेत सडक कटान तथा संरचना निर्माणको कार्यले गति लिन नसकेपछि ठेक्का तोड्ने निर्णय गरिएको मन्त्रालयले जनाएको छ। ठेक्का तोड्दासम्म यस आयोजनाको भौतिक प्रगति १९ दशमलव ८३ प्रतिशतमा सीमित रहेको छ।
कूल ३९ करोड ९९ लाख २९ हजार रूपैयाँ लागत अनुमान गरिएको यस सडकको ठेक्का तोडिएसँगै सडक डिभिजन कार्यालयले निर्माण व्यवसायीबाट ३८ करोड २३ लाख ९६ हजार ४९३ रूपैयाँ सरकारी कोषमा दाखिला गर्न पत्राचार गरेको छ।
छ वटा रुग्ण ठेक्का अन्त्य
यस कारबाहीसँगै सडक डिभिजन कार्यालयमार्फत लामो समयसम्म सडक तथा पुल निर्माणको काम नगरेका अन्य रुग्ण ठेक्काहरू पनि खारेज गरिएका छन्। २०७६ सालदेखि काम अलपत्र परेका योजनाहरूको ठेक्का तोडिएको हो।
खारेज गरिएका रुग्ण ठेक्काहरूमा साँफे–मार्तडी सडकको मर्मत, चौखुट्टे क्षेत्रमा सडक मर्मत र नाली निर्माण, बाजुराको कोल्टी–कवाडी–बिच्छ्याँसैन सडक, तथा मङ्गलसेन–सुवाखाँद–खेतगैरे–जुलिमारे–ढकारी सडक आयोजना रहेका छन्। विकास निर्माणका काममा लापर्बाही गर्ने र समयमा काम नगर्ने प्रवृत्तिविरुद्ध मन्त्रालयले नियमन कडा पार्दै लगेको यो पछिल्लो ठूलो कदम हो।
