माल्दिभ्समा जारी फाइभ नेसन्स पुरुष बास्केटबल च्याम्पियनसिपअन्तर्गत लिग चरणको आफ्नो अन्तिम खेलमा नेपालले आयोजक माल्दिभ्सलाई पराजित गर्दै विजयी हासिल गरेको छ ।
माल्दिभ्सको मालेमा आइतवार राति भएको खेलमा नेपालले आयोजक माल्दिभ्सलाई ७५–६८ अंकले पराजित गर्दै विजयी हासिल गरेको हो ।
नेपालको यो तेस्रो जीत हो । पहिलो खेलमा भुटानसँग पराजित नेपालले त्यसपछि लगातार पाकिस्तान र बंगलादेशलाई हराएको थियो ।
जीतसँगै नेपाल शीर्ष स्थानमा रहँदै सेमिफाइनलमा पुगेको हो । ४ खेलमा ७ अंक जोड्दै नेपाल शीर्षस्थान रह्यो । समान अंकका साथ पाकिस्तान दोस्रो स्थानमा रह्यो ।
समान ६ अंकका साथ बंगलादेश तेस्रो र भुटान चौथो स्थानमा रह्यो । ४ अंक जोडेको माल्दिभ्स समूह चरणबाट बाहिरिएको छ । शीर्ष ४ टोलीले सेमिफाइनल खेल्नेछन् ।
प्रतियोगितामा नेपालसहित दक्षिण एसियाका ५ राष्ट्रको सहभागिता रहेको छ ।
