जनकपुर बोल्ट्स र काठमान्डु गोर्खाज आज आमनेसामने, पहिलो जितको खोजीमा दुवै टोली

नेपाल प्रिमियर लिग (एनपीएल) क्रिकेटको तेस्रो संस्करणमा आज (बिहीबार) जनकपुर बोल्ट्स र काठमान्डु गोर्खाजबीच प्रतिस्पर्धा हुँदैछ। कीर्तिपुरस्थित अन्तर्राष्ट्रिय क्रिकेट मैदानमा हुने यो खेल दिउँसो १२:३० बजेबाट सुरु हुनेछ। एनपीएलको यस संस्करणमा जनकपुरले आफ्नो दोस्रो खेल खेल्न लागेको हो भने काठमान्डु गोर्खाजले यसै खेलबाट आफ्नो अभियानको सुरुआत गर्दैछ।

यसअघि आफ्नो पहिलो खेलमा जनकपुर बोल्ट्स कर्णाली याक्ससँग १९ रनले पराजित भएको थियो। टस हारेर पहिले ब्याटिङको निम्तो पाएको कर्णालीले निर्धारित ओभरमा ९ विकेट गुमाउँदै १३२ रन बनाएको थियो। सो खेलमा जनकपुरका कप्तान हरमित सिंहले ३ तथा मोइन अली र राहुल यादवले २–२ विकेट लिएर राम्रो बलिङ प्रदर्शन गरेपनि ब्याटिङ लाइनअप कमजोर साबित हुँदा जनकपुर हार बेहोर्न बाध्य भएको थियो।

ब्याटिङ सुधार गर्दै पहिलो जितको खोजीमा जनकपुर

सामान्य लक्ष्य पछ्याउने क्रममा कर्णालीविरुद्ध जनकपुरको ब्याटिङ निकै कमजोर देखिएको थियो। १९.३ ओभरमै अलआउट हुनुअघि जनकपुरले ११३ रन मात्र बनाउन सकेको थियो। टोलीका अधिकांश ब्याटरहरू दोहोरो अंक नछोडी पेभेलियन फर्किएका थिए। ओपनर तृतराज दास १ रन र मयान यादव १४ रनमा आउट हुँदा विश्व क्रिकेटकै प्रभावशाली खेलाडी मानिएका मोइन अली पनि १९ रनभन्दा अगाडि बढ्न सकेनन्।

त्यस्तै, अनिल साह ११ र श्रीलंकाली स्टार कुशल परेरा ६ रनमै आउट भए। जिम्मी निसमले १५ तथा कप्तान हरमित सिंहले १९ रन बनाए भने तल्लो क्रमका अभिषेक तिवारीले सर्वाधिक २० रन जोडे। पहिलो खेलमा देखिएको यही बिर्सनलायक ब्याटिङ कमजोरीलाई सुधार गर्दै जनकपुर काठमान्डु गोर्खाजविरुद्ध आज मैदान उत्रँदा पहिलो जित निकाल्ने दाउमा हुनेछ।