जल तथा मौसम विज्ञान विभागले आज देशका केही स्थानमा भारी वर्षाको सम्भावना रहेको भन्दै बाढीको जोखिम बढ्न सक्ने चेतावनी दिएको छ। विशेषगरी, कञ्चनपुरसहित सुदूरपश्चिम र पहाडी जिल्लाहरूका ससाना नदी तथा खोलामा आकस्मिक बाढी आउने सम्भावना रहेको पूर्वानुमान गरिएको छ।
नदीहरूको वर्तमान अवस्था
मङ्गलबार बिहान गरिएको मापनअनुसार, नारायणी, वाग्मती, कर्णाली र यिनका सहायक नदीहरू, साथै कन्काई, कमला, पूर्वी राप्ती, पश्चिम राप्ती र बबई नदीहरूको बहाव सतर्कता तहभन्दा तलै रहेको छ। यस्तै, कोसी र महाकाली र यिनका सहायक नदीहरूको बहाव भने सतर्कता तहको आसपासमा छ।
बाढीको सम्भावित जोखिम क्षेत्र
उच्च जोखिम: विभागको पूर्वानुमानअनुसार, कञ्चनपुर र आसपासका जिल्ला भएर बग्ने ससाना नदी तथा खोलामा पानीको बहाव उल्लेख्य बढ्ने र केहीमा आकस्मिक बाढीको उच्च जोखिम रहेको छ।
मध्यम जोखिमको उच्च सम्भावना: दोलखा, सिन्धुपाल्चोक, रामेछाप, हुम्ला, बझाङ, बाजुरा, डोटी, अछाम, दार्चुला, बैतडी, डडेलधुरा, कैलाली र आसपासका जिल्ला भएर बहने ससाना नदीहरूको बहाव उल्लेख्य बढ्नेछ र केहीमा आकस्मिक बाढीको मध्यम जोखिमको उच्च सम्भावना रहेको छ।
मध्यम जोखिमको मध्यम सम्भावना: इलाम, झापा, मोरङ, ताप्लेजुङ, संखुवासभा, सोलुखुम्बु, ओखलढुंगा, खोटाङ, रसुवा, धादिङ, नुवाकोट, काठमाडौं, भक्तपुर, ललितपुर, गोरखा, लमजुङ, तनहुँ, डोल्पा, मुगु, बर्दिया र आसपासका जिल्ला भएर बग्ने केही नदी तथा खोलाको बहाव बढ्ने र आकस्मिक बाढीको मध्यम जोखिमको मध्यम सम्भावना रहेको छ।
विभागका अनुसार, दिउँसो कोसी प्रदेशका एकदुई स्थानमा भारी वर्षाको सम्भावना छ भने राति गण्डकी, लुम्बिनी र सुदूरपश्चिम प्रदेशका एकदुई स्थानमा पनि भारी वर्षाको सम्भावना रहेको छ।
