मृत घोषणा गरिएका मोरङका पदमबहादुर ६ महिनापछि घर फर्किए, अन्त्येष्टि गरिएको शव कसको थियो?

मृत्यु भइसकेको ठानी परिवारले दाहसंस्कारसमेत गरिसकेका मोरङको लेटाङ नगरपालिका–५ खेरूवाका ३७ वर्षीय पदमबहादुर राय करिब ६ महिनापछि जीवितै घर फर्किएका छन्। गत माघदेखि सम्पर्कविहीन भएका उनको सुनसरीको चकरघट्टिमा भएको सवारी दुर्घटनामा परेर मृत्यु भएको विश्वासमा परिवारले गत जेठमा अन्त्येष्टि गरेको थियो। तर अचानक उनी घर फर्किएपछि परिवार, आफन्त र स्थानीयवासी आश्चर्यचकित भएका छन्।

पारिवारिक स्रोतका अनुसार दुर्घटनामा परेको शवको अनुहार र शारीरिक बनावट मिल्दोजुल्दो देखिएपछि आफन्तले त्यसलाई पदमबहादुरकै शव ठानेर चिसाङ खोलामा दाहसंस्कार गरेका थिए। त्यसबेला परिवारले दुर्घटना बीमाबापत ५ लाख ५० हजार रुपैयाँ पनि बुझेका थिए। घर छाडेपछि उनी भारतको आसाम क्षेत्रमा बस्दै आएको खुलेको छ। उनी हालै त्यहीँबाट फर्किएपछि परिवारले धार्मिक परम्पराअनुसार जन्म, न्वारान तथा व्रतबन्धसम्बन्धी कर्म पूरा गरेर उनलाई घरभित्र्याएका छन्।

प्रहरीद्वारा घटनाको पुनः अनुसन्धान सुरु

पदमबहादुर जीवितै घर फर्किएपछि प्रहरीले उक्त घटनासँग सम्बन्धित पुराना फाइलहरू खोल्दै पुनः अनुसन्धान थालेको छ। मोरङका प्रहरी प्रमुख एसपी कवित कटुवालका अनुसार परिवारले पदमबहादुर जीवितै रहेको पुष्टि गरेसँगै प्रहरीले घटनासँग सम्बन्धित पुराना तस्बिर र भिडिओहरूको अध्ययन गरिरहेको छ।

‘उहाँ जीवितै फर्किएको कुरा परिवारले पुष्टि गर्नुभएपछि हामी फोटो–भिडिओ हेरेर पुनः अनुसन्धानमा जुटेका छौँ,’ एसपी कटुवालले बताए। उनका अनुसार परिवारले बुझेको बीमा रकम फिर्ता गर्ने प्रतिबद्धता जनाएको छ र अनुसन्धानमा राम्रोसँग समन्वय गरिरहेको छ। अबको प्रहरी अनुसन्धान मुख्यतया दुई वटा प्रश्नमा केन्द्रित हुनेछ– त्यसबेला अस्पतालमा राखिएको शवको वास्तविक पहिचान के थियो र परिवारले त्यसलाई पदमबहादुरकै शव कसरी ठहर गर्यो।