१४ असार, मेचीनगर : झापामा जारी निषेधाज्ञालाई थप एक साता लम्ब्याइएको छ ।
आज राति १२ बजेसम्मका लागि जारी निषेधाज्ञालाई स्वरुप परिवर्तन गर्दै असार २१ गते राति १२ बजेसम्म कायम गर्ने निर्णय भएको हो ।
झापाका प्रमुख जिल्ला अधिकारी श्रवणकुमार तिमिल्सिनाद्वारा जारी आदेशमा अत्यावश्यक काम वाहेक हिँडडुलमा लगाइएको प्रतिवन्ध कायमै रहेको जनाइएको छ ।
हाट बजार, मेला, जात्रा, महोत्सव, पाटी, भोज लगायत भिड भाडहुने कार्यक्रम नगर्न भनिएको छ ।
पसल सञ्चालनको हकमा अत्यावश्यक सेवाका वाहेकका अन्य पसलहरु विहान ६ बजेदेखि दिउँसो ३ बजेसम्म स्वास्थ्य मापदण्ड पालना गरी सञ्चालन गर्न दिने उल्लेख छ ।
सवारीसाधन सञ्चालन सम्बन्धमा अत्यावश्यक सेवाहरु बाहेकका सबै प्रकारका निजी सवारीसाधन, सिटी/सफारी, अटो रिक्सा स्वास्थ्य सुरक्षा मापदण्डको पूर्ण पालना गरी जोर गते जोर नम्बर र बिजोर गते बिजोर नम्बरका मात्र झापा जिल्ला भर सञ्चालन गर्न दिने आदेश गरिएको छ ।
होटल तथा रेष्टुरेन्टहरुले भने टेकअवे सेवा मात्र सञ्चालन गर्न पाउँने छन् ।
मलखाद तथा बिउ विजन, कुखुराका चल्ला, दाना, पशुपंक्षीका आहारलगायतका कृषि सम्बन्धि पसल विहान ६ बजेदेखि दिउँसो ३ बजेसम्म मात्र सञ्चालन गर्न दिने उल्लेख छ ।
सरकारी, सार्वजनिक संस्थान, बिमालगायतका कार्यालयहरुले स्वास्थ्य मापदण्डको पूर्णरुपमा पालना गरी भीडभाड नगराइ आलोपालो प्रणाली अपनाइ सञ्चालन गर्ने भनिएको छ ।
झापामा पूर्ण निषेधाज्ञा जारी भएयता सातौं पटक निषेधाज्ञाको आदेश थप गरिएको हो ।
जिल्लाको आंशिक निषेधाज्ञालाई गएको वैशाख १७ गतेबाट परिमार्जन गर्दै प्रमुख जिल्ला अधिकारीबाट झापामा हिँडड्लमा पूर्ण प्रतिबन्धसहितको लकडाउन गरिएको थियो ।
कोरोना संक्रमण जोखिमको अवस्थालाई हेरेर पछिल्ला दिनहरुमा निषेधाज्ञालाई खुकुलो पारिदै लगिएको छ ।
हेर्नुहोस् आदेश :
