झापाका सीडीओ पोखरेलले सार्वजनिक गरे एक महिनाको प्रगति, ‘शून्य बाँकी आवेदन’देखि फेसलेस सेवासम्म

जिल्ला प्रशासन कार्यालय झापाका प्रमुख जिल्ला अधिकारी (सीडीओ) श्रवणकुमार पोखरेलले पदभार सम्हालेको एक महिनाको अवधिमा गरिएका प्रमुख कार्य तथा प्रशासनिक सुधारका प्रयासहरू सार्वजनिक गर्नुभएको छ। बिहीबार जिल्ला प्रशासन कार्यालयमा आयोजित पत्रकार भेटघाट तथा शुभकामना आदानप्रदान कार्यक्रममा सीडीओ पोखरेलले आफ्नो एकमहिने कार्यकालको प्रगति विवरण प्रस्तुत गर्दै प्रशासनिक सेवालाई चुस्त, पारदर्शी र जनमुखी बनाउन विभिन्न अभियान सञ्चालन गरिएको जानकारी दिनुभयो।

उहाँका अनुसार सर्वसाधारणले सरकारी सेवा लिन अनावश्यक ढिलासुस्ती व्यहोर्नु नपरोस् भन्ने उद्देश्यले ‘शून्य बाँकी आवेदन’ अभियान सञ्चालन गरिएको छ। साथै, बिहान ७ बजेदेखि बेलुका ६ बजेसम्म सेवा प्रवाह गरी दर्ता भएका आवेदन सोही दिन फछ्र्यौट गर्ने व्यवस्था मिलाइएको उहाँले बताउनुभयो। सेवाग्राहीलाई बिचौलियाको झन्झटबाट मुक्त गराउँदै सेवा प्रवाहलाई सहज बनाउन फेसलेस सेवा तथा अनलाइन भुक्तानी प्रणालीलाई समेत प्रोत्साहन गरिएको छ।

बजार अनुगमन र चाडपर्व लक्षित सुपथ मूल्य पसल

डिजिटल माध्यमबाट सेवा उपलब्ध गराउने प्रयासले प्रशासनिक प्रक्रियालाई थप पारदर्शी र प्रभावकारी बनाउने अपेक्षा गरिएको छ। यसैबीच, चाडपर्वलाई लक्षित गर्दै सर्वसाधारणलाई राहत पुर्‍याउने उद्देश्यले सुपथ मूल्य पसल सञ्चालनमा ल्याइएको र बजारमा हुने अनियमितता नियन्त्रण गर्न अनुगमनलाई तीव्र पारिएको पनि सीडीओ पोखरेलले जानकारी दिनुभयो। उपभोक्ताको हित संरक्षण गर्दै उपभोक्तामैत्री बजार निर्माण गर्न प्रशासनले पहल गरिरहेको उहाँको भनाइ थियो।

जेनजी घाइतेको तथ्याङ्क सङ्कलन र शान्ति सुरक्षा

यसैगरी, विभिन्न आन्दोलन तथा घटनाक्रमका क्रममा घाइते भएका ‘जेनजी’ आन्दोलनका घाइतेहरूको तथ्याङ्क सङ्कलन गरी प्रोफाइल तयार पारिएको पनि उहाँले बताउनुभयो। कार्यक्रममा सीडीओ पोखरेलले आसन्न चाडपर्वको शुभकामना व्यक्त गर्दै जिल्लाको शान्ति सुरक्षा कायम गर्ने, सुशासन प्रवर्द्धन गर्ने तथा नागरिकलाई पारदर्शी र प्रभावकारी सेवा उपलब्ध गराउने कार्यमा प्रशासन सदैव प्रतिबद्ध रहेको दोहोर्‍याउनुभयो।