झापा जिल्लामा असोज १८ देखि २० गतेसम्म भएको लगातारको वर्षापछि आएको बाढी र डुबानका कारण ५१२.६३ हेक्टर क्षेत्रफलमा लगाइएको कृषि बालीमा ठूलो क्षति पुगेको छ। यस क्षतिबाट ७४९ परिवार प्रभावित भएका छन्। जिल्लास्थित कृषि ज्ञान केन्द्रका प्रमुख सागर विष्टका अनुसार, भारी वर्षा र बाढीका कारण करिब ७ करोड ६० लाख २८ हजार २२० रुपैयाँ बराबरको कृषि बालीमा क्षति भएको प्रारम्भिक अनुमान छ।
बाढीले सबैभन्दा बढी झापा गाउँपालिकाको वडा नं १, २ र ३ लाई प्रभावित पारेको छ, जहाँ ३६५.२७ हेक्टर क्षेत्रफलमा लगाइएका धान, गहुँ र सागसब्जीमा क्षति पुगेको छ। केन्द्रले सङ्कलन गरेको विवरणअनुसार गौरीगञ्ज, शिवसताक्षी, भद्रपुर, गौरादह र कनकाई नगरपालिकाका विभिन्न वडाहरूमा पनि कृषि बालीमा क्षति पुगेको छ।
बाढीले सबैभन्दा बढी धानखेतीमा असर गरेको छ। झापाका ७०३ कृषकले ४६३.४२ हेक्टर क्षेत्रफलमा लगाएको धानबालीमा क्षति पुगेको छ। क्षति पुगेका अन्य बालीहरूमा तरकारी, आलु, केरा, जुट, मास र भुइँकटहरलगायत रहेका छन्। यसैबीच, बाढीबाट प्रभावित परिवारलाई जिल्ला विपद् व्यवस्थापन समितिमार्फत स्थानीय तहको समन्वयमा राहत वितरण सुरु गरिएको प्रमुख विष्टले जानकारी दिए।
