काठमाडौं : नेपाल कम्युनिस्ट पार्टी (नेकपा) का अध्यक्षद्वय केपी शर्मा ओली र पुष्पकमल दाहाल प्रचण्डले पार्टीमा कुनै प्रकारको गुटबन्दी नगर्न निर्देशन दिएका छन्।
शुक्रवार सम्पन्न स्थायी कमिटी बैठकको निर्णयहरु समेटेर जारी गरेको अन्तरपार्टी निर्देशन (अपानि)मा गुटबन्दी गर्नेलाई विधान वमोजिम कारबाही गर्ने उल्लेख छ।
‘आफ्नो मत वा असहमति कमिटी प्रणालीअन्तर्गत मर्यादित रूपमा राख्ने, गुटबन्दीपूर्ण क्रियाकलाप नगर्ने, गुटगत गतिविधिलाई संरक्षण, प्रश्रय र प्रोत्साहन नदिने, अनेकता, अराजकता, अनुशासनहीनता र गुटबन्दीपूर्ण कार्यलाई अनुशासनात्मक कारबाहीको विषय बनाउने र पार्टी विधानबमोजिम कारवाही गर्ने’ भनिएको छ।
विवादमा नफर्किने प्रतिबद्धता
ओली र प्रचण्डले पुन: पार्टी विवादमा नफर्किने प्रतिबद्धता पनि गरेका छन्। विवादमा नफर्कने समय भने पाँचौ स्थायी कमिटी बैठकलाई तोकिएको छ। नेकपा लामो समय विवादमा रुमल्लिएको थियो। विवाद समाधान गर्न बनेको कार्यदलको प्रतिवेदनलाई ओली-प्रचण्डले संशोधन गरी स्थायी कमिटी बैठकमा प्रस्ताव लगेका थिए। उक्त प्रस्तावले नेकपाको विवाद तत्कालका लागि अवतरण भएको छ। यस्तोमा अध्यक्षद्वयले विवादमा नफर्किने वाचा गरेका हुन्।
‘पार्टीभित्र देखापरेको विवाद वा मतभेदका सम्बन्धमा स्थायी कमिटीको पाँचौ बैठक समापनको मिति २०७७ भदौ २६ गतेलाई पुरानो विवादतर्फ नफर्किने निश्चित समय निर्धारण गर्ने र पुनः त्यसप्रकारको अन्तर्विरोधपूर्ण विवाद नहुने कुरा सुनिश्चित गर्ने। सार्वजनिक रूपमा गरिने तथ्यहीन र अमर्यादित आरोप–प्रत्यारोप बन्द गर्ने,’ अध्यक्षद्वयले संकल्प गरेका छन्।
त्यस्तै, नेतृत्व तहको असमझदारी, अविश्वास र अन्तरविरोध समाधान गर्ने र परस्परमा विश्वास कायम गर्ने संकल्प पनि गरिएको छ।त्यस्तै सबै खाले प्रतिकृयावादी तथा अवसरवादी षडयन्त्र तथा दाउपेचहरूलाई चिर्दै पार्टी एकतालाई अक्षुण्ण राख्ने र जनता एवम् राष्ट्रको हितमा समर्पित, निस्वार्थ एवम् सिद्धान्तनिष्ठ एकताको पक्षमा दृढताका साथ उभिने प्रतिज्ञा पनि गरिएको छ।
पद्धती र संस्थागत प्रणालीलाई सबल तुल्याउने
नेकपाले पार्टीलाई विधिसम्वत तथा मर्यादित बनाउने प्रण पनि गरेको छ। गुट-उपगुटलाई नियन्त्रण गर्ने बताइएको छ।
‘पार्टीलाई गुटले विस्थापित गर्न खोज्ने, गुट–गुटका अलग–अलग बैठक बस्ने, निर्णय गर्ने र सार्वजनिक रूपमा आरोप–प्रत्यारोपमा उत्रिने जस्ता गलत अभ्यासहरूलाई कडाइका साथ नियन्त्रण गर्ने र पार्टीलाई अनुसाशित र पार्टीभित्रको बहस–विवादलाई विधिसम्मत तथा मर्यादित तुल्याउने प्रण गर्दछ,’ अपानीमा उल्लेख छ।
नेकपाले शक्ति र सामर्थ्यलाई ठीक ढंगले बुझ्न र व्यक्तिगत हितलाई पार्टी हितको मातहत राख्न नसक्दा अन्तरविरोध कटुतापूर्ण बनेको ठहर पनि गरेको छ। अन्तरविरोधलाई समाधान गर्न नसक्दा आन्तरिक एकता कमजोर भएको निष्कर्षमा नेकपा पुगेको हो।
‘चुनौती दिने प्रवृति झाँगिदै जाँदा पद्धतीहीनता, गुटबन्दी, अराजकता र अनुशासनहिनता फैलिँदै गयो। विभिन्न सन्दर्भमा नेतृत्व तहबाट समेत गम्भीर प्रकृतिका गल्ती, कमजोरीहरू हुन पुगे। पार्टीभित्र उत्पन्न अन्तरविरोधहरूलाई ठीक ढङ्गले समाधान गर्न नसक्दा संस्थागत प्रबन्ध उलङ्घन हुँदै गयो र आन्तरिक एकता कमजोर भयो,’ भनिएको छ।
अध्यक्षद्वयले विगतका अन्तर्विरोध एवम् अनुभवहरूबाट शिक्षा लिन र पार्टी एकताको मर्म एवम् भावना, दुई पार्टीबीच एकता गर्दाका सहमतिहरू र संस्थागत रूपमा तय गरिएका नीति, विचार विधि तथा पद्धती अनुशरण एवम् कार्यान्वयन गर्दै
अघि बढ्न सम्बन्धित नेता कार्यकार्तालाई निर्देशित पनि गरेका छन्।
समाजिक सञ्जालमा नेताहरुमाथि जथाभावी लेख्न कडाइ
नेकपाले समाजिक सञ्जालमा नेताहरुको विषयमा जथाभावी बोल्न कडाइ गर्ने भएको छ। त्यस्ता गतिविधीलाई रोक्न ओली-प्रचण्डले निर्देशन दिएका छन्।
‘पार्टीको नीति, नेता र कार्यकर्ताका विरुद्ध सामाजिक सञ्जालमा जथाभावी लेख्ने र पार्टी हित विपरीत गतिविधि गर्ने प्रवृत्तिलाई कडाइकासाथ रोक्न जिम्मेवार कमरेडहरू र सम्बद्ध सबैलाई निर्देशित गर्दछ,’ अपानिमा भनिएको छ।
त्यस्तै, सञ्चार माध्यमहरूमा पार्टी हित विपरितका अनधिकृत, प्रायोजित र तथ्यहीन समाचार सम्प्रेषण गर्ने प्रवृतिलाई नियन्त्रण गर्न निर्देशन दिइएको छ।
‘पार्टी हित विपरितका अनधिकृत, प्रायोजित र तथ्यहीन समाचार सम्प्रेषण गर्ने प्रवृतिलाई नियन्त्रण गर्ने र त्यस्ता पात्रलाई जवाफदेही बनाउने, बुँदा ५ को (३) मा भनिएको छ,’ वेबसाइट तथा अन्य डिजिटल प्लेटफर्महरूमा देखापरेको पार्टीका नेता तथा कार्यकर्ताहरूको अराजक तथा अनुशासनहीन कार्यलाई नियन्त्रण गर्ने।‘
नेकपाले विभिन्न नेताहरुको नाममा रहेको प्रतिष्ठान गुटबन्दीको माध्यम बन्दै गएको निश्कर्ष पनि निकालेको छ। गुटबन्दी रोक्न प्रतिष्ठानहरूलाई नियमन गर्ने निर्णय पनि गरिएको छ। त्यस्तै १९ पृष्ठ लामो अपानिमा अध्यक्षद्वयको कार्यविभाजन, कार्तिक १५-१७ केन्द्रीय कमिटी बैठक बस्ने, चैतको २५-३० मा पार्टीको महाधिवेशन गर्ने, एमसीसी परिमाजर्न गरी अनुमोदन गर्ने लगायतका स्थायी कमिटी बैठकले गरेका निर्णयहरुहरु समावेश छन्।
