बाजुराको बडीमालिकामा हिमपातमा फसेका एक युवाको उद्धार, अर्का एकको खोजी जारी

बाजुराको प्रसिद्ध धार्मिक तथा पर्यटकीय क्षेत्र बडीमालिकामा भारी हिमपात भएपछि फसेका दुई जना पर्यटकमध्ये एक जनाको नेपाली सेनाको हेलिकप्टरमार्फत उद्धार गरिएको छ भने अर्का एक युवा अझै सम्पर्कविहीन रहेकाले खोजी कार्य तीव्र पारिएको छ।

चार हजार दुई मिटर उचाइमा रहेको बडीमालिका मन्दिरको दर्शन गरी फर्किने क्रममा अचानक भएको हिमपातका कारण त्रिवेणी पाटनस्थित धर्मशालामा फसेका कञ्चनपुरको कृष्णपुर नगरपालिका-२ का २१ वर्षीय सागर कार्कीको उद्धार गरिएको प्रमुख जिल्ला अधिकारी मुक्तिराम रिजालले जानकारी दिनुभएको छ। उहाँका अनुसार उद्धार गरिएका कार्कीको स्वास्थ्य अवस्था सामान्य रहेको छ र उनलाई हेलिकप्टरमार्फत सदरमुकाम मार्तडी पुर्‍याइएको छ।

सम्पर्कविहीन व्यक्तिको खोजी कार्य जारी

हिमपातका कारण बडीमालिका क्षेत्रबाटै सम्पर्कविहीन भएका कञ्चनपुरको बेदकोट नगरपालिकाको दैजी घर भएका २० वर्षीय मनिष बोहराको खोजीका लागि सुरक्षाकर्मी परिचालन गरिएको छ। बोहराको खोजी कार्य गर्न सदरमुकामस्थित सेनाको ईश्वरीबक्स गुल्मबाट आवश्यक जनशक्तिसहितको हेलिकप्टर पुनः सो क्षेत्रमा प्रस्थान गरेको जिल्ला प्रशासन कार्यालयले जनाएको छ।

पाँच जनाको टोलीमा गएका थिए पर्यटकहरू

गत असोज ९ गते सदरमुकाम मार्तडीबाट बडीमालिकाको यात्राका लागि पाँच जनाको टोली प्रस्थान गरेको थियो। तीमध्ये पूर्वतर्फका तीन जना यात्रु भने बडीमालिकाबाट समयमै फर्केर सकुशल मार्तडी पुगिसकेका छन्। मौसममा आएको अचानक परिवर्तन र भारी हिमपातका कारण लेकमा पर्यटकहरू समस्यामा पर्ने गरेकाले त्यसतर्फ सचेत रहन स्थानीय प्रशासनले आग्रह गरेको छ।