इटहरी ।इटहरीको अम्बे कोसी बचत तथा ऋण सहकारी संस्थाका अध्यक्ष सहित चार जना सञ्चालकलाई प्रहरीले पक्राउ गरेको छ ।
संस्थाका अध्यक्ष फणीन्द्र मगर सहित शिला गजमेर, राहुल अग्रवाल र कुमार आलेलाई पक्राउ गरेको प्रहरीले जनाएको छ । जिल्ला प्रहरी कार्यालय सुनसरीबाट प्रहरी निरीक्षक सहितको टोली परिचालन गरिएको थियो ।
जिल्ला प्रहरी प्रमुख प्रहरी उपरीक्षक विपिन रेग्मिका अनुसार बचत कर्ता उजुरीका आधारमा पक्राउ गरिएको हो । अहिले प्रारम्भिक अनुसन्धानकै चरणमा रहेकाले थप केही भन्न नसकिने उनको भनाइ छ । पछिल्लो समय सहकारी तथा वित्तीय क्षेत्र संवेदनशील बन्दै गएकाले प्रहरीले गम्भीर रूपमा लिएको रेग्मीले बताए ।
केही समययता संस्थाबाट पीडितहरूले दुर्गाप्रसाद कोइरालाको अध्यक्षतामा सङ्घर्ष समितिले गठन गरी संस्थाविरुद्ध आन्दोलन गर्दै आएका थिए । सहकारी डुब्दा संस्थाका पाँच हजार बढी बचतकर्ता तथा सेयर सदस्यहरू मर्कामा परेको पीडितहरू बताउँछन् ।सञ्चालकले ४० करोड भन्दा बढी बचत रकम फिर्ता गर्नुपर्ने बचतकर्ताहरूको दाबी छ ।
