झापा । भोटेकोशी, त्रिशूलीलगायतका विभिन्न नदीहरूमा आएको विनाशकारी बाढी-पहिरो र त्यसबाट भएको ठूलो जनधनको क्षतिले मुलुक शोकमा डुबेका बेला झापाको निजी विद्यालय क्षेत्र राहत तथा पुनःस्थापना अभियानमा अग्रपंक्तिमा खटिएको छ। विपत्तिमा परेका परिवारहरूको मलम बन्न निजी तथा आवासीय विद्यालय अर्गनाइजेसन नेपाल (प्याब्सन) झापाले कुल १ करोड ८ लाख ३० हजार ४ सय ३५ रुपैयाँ सहयोग जुटाएको छ।
नेपाल सरकारले बाढीपहिरो प्रभावितको उद्धार, राहत तथा पुनःस्थापनाका लागि गरेको राष्ट्रिय आह्वान र प्याब्सन केन्द्रीय कार्यसमितिको निर्देशनसँगै झापाका सदस्य विद्यालयहरूले आफ्ना सञ्जालमार्फत यो ठूलो सहयोग रकम संकलन गरेका हुन्। विद्यालय सञ्चालकहरूसहित शिक्षक, कर्मचारी, विद्यार्थी र अभिभावकको सामूहिक सहभागितामा संकलन गरिएको यो रकमले विपद्का बेला झापाको संस्थागत विद्यालय क्षेत्रले निर्वाह गर्ने सामाजिक उत्तरदायित्व र मानवीय संवेदनालाई प्रस्ट रूपमा उजागर गरेको छ।
प्याब्सन झापाका अध्यक्ष छत्रबहादुर कार्कीका अनुसार जिल्लाभरका सदस्य विद्यालयहरूबाट ९५ लाख ४३ हजार २९ रुपैयाँ प्याब्सन झापाको आधिकारिक बैंक खातामा दाखिला भएको थियो। संकलित रकमलाई व्यवस्थित गर्न पहिलो चरणमा ७५ लाख ९३ हजार ९ सय ४७ रुपैयाँ र दोस्रो चरणमा १९ लाख ४९ हजार ८२ रुपैयाँ खातामा जम्मा गरिएको जानकारी सचिव लक्ष्मीप्रसाद उप्रेतीले दिनुभयो।
प्राप्त कुल रकममध्ये प्याब्सन झापाले केन्द्रीय कार्यसमितिको निर्देशनबमोजिम ८९ हजार रुपैयाँ प्याब्सन केन्द्रीय राहत कोषमा पठाएको छ। यस्तै, झापाका सदस्य विद्यालयहरूले आफ्नो तर्फबाट सोझै प्रधानमन्त्री राहत तथा दैवी प्रकोप कोषमा ११ लाख ९८ हजार ४ सय ६ रुपैयाँ जम्मा गरेका छन्। यसरी प्याब्सन झापाको खातामा जम्मा भएको, केन्द्रीय राहत कोषमा पठाइएको र प्रधानमन्त्री दैवी प्रकोप कोषमा सोझै दाखिला गरिएको सबै रकम जोड्दा १ करोड ८ लाख ३० हजार ४ सय ३५ रुपैयाँ पुगेको अध्यक्ष कार्की र सचिव उप्रेतीले संयुक्त रूपमा स्पष्ट पार्नुभएको छ।
प्राकृतिक विपत्तिले घरबारविहीन र विस्थापित भएका परिवारहरूको पीडा केवल आर्थिक सहयोगले मात्र पुरानै अवस्थामा फर्काउन नसकिए पनि दुःखको बेला सिङ्गो शैक्षिक समुदाय साथमा छ भन्ने अनुभूति गराउनु यस अभियानको मूल ध्येय रहेको अध्यक्ष कार्कीले बताउनुभयो। यो पहल केवल संस्थागत निर्णयमा मात्र सीमित नरही प्रत्येक विद्यालयका विद्यार्थी र अभिभावकको आत्मीय सहभागितामा आधारित सामूहिक अभियान बनेको प्याब्सन झापाको भनाइ छ।
विपत्तिको समयमा संकलन हुने राहत रकममा पारदर्शिता सबैभन्दा महत्त्वपूर्ण हुने भएकाले प्याब्सन झापाले रकमको स्रोत, दाखिला भएको बैंक विवरण र पठाइएको कोषको पूर्ण पारदर्शिता सुनिश्चित गरेको छ। प्याब्सन झापाको बैठकबाट निर्णय नं. ९ मार्फत सहयोगसम्बन्धी सम्पूर्ण हरहिसाब सर्वसम्मत रूपमा पारित गरी सार्वजनिक गरिएको हो।
तत्कालका लागि राहत उपलब्ध गराइए तापनि बाढीपीडित बालबालिकाको शिक्षालाई निरन्तरता दिन, भत्किएका संरचनाको पुनर्निर्माण गर्न र दीर्घकालीन पुनःस्थापनाका लागि राज्यसँगै निजी क्षेत्र, सामाजिक संस्थाहरूको निरन्तर सहयोग आवश्यक पर्ने प्याब्सन झापाले जनाएको छ। कोशी प्रदेशभरिमै बाढीपीडितका लागि यति ठूलो परिमाणमा सहयोग रकम जुटाउने जिल्लामध्ये झापाको योगदान उल्लेखनीय र प्रेरणादायी बनेको छ।
