काठमाडौं । नेपाली कांग्रेसको १५औँ महाधिवेशनअन्तर्गत नयाँ केन्द्रीय कार्यसमिति चयनका लागि शुक्रबार भएको मतदान निर्धारित समयभित्र सम्पन्न हुन सकेन। दोस्रो पटक थपिएको समयअनुसार साँझ ७ बजेसम्म मतदान गर्ने समय तोकिए पनि त्यस अवधिसम्म पनि सबै प्रतिनिधिले मतदान गर्न सकेनन्।
निर्वाचन समितिका सदस्यसचिव राजु कटुवालका अनुसार मतदानको निर्धारित समय सकिए पनि मतदान केन्द्रमा लाइनमा रहेका सबै प्रतिनिधिले मतदान गर्न पाउनेछन्। यससँगै निर्धारित समयपछि पनि लाइनमा रहेका प्रतिनिधिका लागि मतदान प्रक्रिया जारी रहने भएको छ।
कांग्रेसको केन्द्रीय कार्यसमिति चयनका लागि शुक्रबार बिहानदेखि काठमाडौंको राष्ट्रिय सभागृह र खुलामञ्चमा मतदान भइरहेको थियो। बिहान करिब ८ बजेदेखि सुरु भएको मतदानका लागि सुरुमा दिउँसो ३ बजेसम्मको समय निर्धारण गरिएको थियो। तर, ठूलो संख्यामा प्रतिनिधि मतदान गर्न बाँकी रहेपछि समय थप गरिएको थियो।
निर्धारित समयभित्र मतदान सम्पन्न नहुने देखिएपछि निर्वाचन समितिले पहिलोपटक दुई घण्टा समय थप गर्दै साँझ ५ बजेसम्म मतदान गर्ने व्यवस्था गरेको थियो। ५ बजेसम्म पनि मतदान नसकिएपछि पुनः दुई घण्टा थपेर साँझ ७ बजेसम्म मतदान गर्ने समय तोकिएको थियो।
तर दोस्रो पटक थपिएको समय अर्थात् साँझ ७ बजेसम्म पनि मतदान पूरा हुन सकेन। उपलब्ध विवरणअनुसार राष्ट्रिय सभागृह र खुलामञ्चमा गरी करिब ५०० प्रतिनिधिले अझै मतदान गर्न बाँकी रहेको थियो।
लाइनमा रहेका सबैले मतदान गर्न पाउने
निर्वाचन समितिले निर्धारित समय सकिए पनि मतदान केन्द्रमा लाइनमा रहेका प्रतिनिधिलाई मतदानबाट वञ्चित नगर्ने भएको छ।
निर्वाचन समितिका सदस्यसचिव राजु कटुवालले ७ बजेको समय सकिए पनि लाइनमा रहेका सबै प्रतिनिधिले मतदान गर्न पाउने जानकारी दिएका छन्। यसअनुसार मतदान केन्द्रमा उपस्थित भई आफ्नो पालो पर्खिरहेका प्रतिनिधिले समय सकिएको कारण मतदान गर्नबाट वञ्चित हुनुपर्ने छैन।
गण्डकीको मतदान सकियो
हालसम्म गण्डकी प्रदेशका प्रतिनिधिको मतदान सम्पन्न भएको छ। बाँकी प्रदेश तथा जनसम्पर्क समितिबाट आएका प्रतिनिधिको मतदान भने जारी रहेको छ।
कांग्रेसको नयाँ नेतृत्व चयनका लागि देशका विभिन्न प्रदेश तथा विदेशस्थित नेपाली जनसम्पर्क समितिबाट निर्वाचित महाधिवेशन प्रतिनिधिहरू मतदानमा सहभागी छन्। मतदानका लागि राष्ट्रिय सभागृह र खुलामञ्चमा छुट्टाछुट्टै व्यवस्था गरिएको छ।
७ हजारभन्दा बढी प्रतिनिधि मतदाता
नेपाली कांग्रेसको १५औँ महाधिवेशनमा ७ हजार ३१७ जना महाधिवेशन प्रतिनिधि मतदान प्रक्रियामा सहभागी हुँदैछन्।
एक प्रतिनिधिले सभापति, उपसभापति, महामन्त्री, सहमहामन्त्री तथा केन्द्रीय सदस्यलगायत विभिन्न पदका लागि २३ वटा मतपत्रमा मतदान गर्नुपर्ने व्यवस्था रहेकाले मतदान प्रक्रिया लामो भएको हो। एक जना प्रतिनिधिलाई मतदान पूरा गर्न करिब आधा घण्टासम्म लाग्न सक्ने अनुमान यसअघि निर्वाचन समितिले गरेको थियो।
मतदान सम्पन्न भएपछि मतपेटिका संकलन गरी नेपाली कांग्रेसको केन्द्रीय कार्यालय सानेपामा लगिने र त्यसपछि मतगणना प्रक्रिया अघि बढाइने निर्वाचन समितिले जनाएको छ।
कांग्रेसको नयाँ नेतृत्व चयनका लागि भइरहेको मतदानमा ढिलाइ भएपछि समय पटक–पटक थपिएको हो। अब मतदान केन्द्रमा लाइनमा रहेका सबै प्रतिनिधिले मतदान गरेपछि मात्र मतदान प्रक्रिया औपचारिक रूपमा सम्पन्न हुनेछ।
